নগাঁৱত পথ দুৰ্ঘটনা : আহত ১৮

নগাঁৱৰ পৰা ৱাহিদুদ জামান

নগাঁও চহৰৰ পৰা ১০ কিঃমিঃ নিলগৰ পানীখাইতীৰ ৩৬নং ৰাষ্ট্ৰীয় ঘাইপথত আজি বিয়লি প্ৰায় ৩.৩০ বজাত সংঘটিত এক পথ দুৰ্ঘটনাত ১৮জনকৈ লোক আহত হয় ।

প্ৰাপ্ত তথ্য মতে, নগাঁও চহৰৰ পৰা কঠীয়াতলি অভিমুখে যাত্ৰী কঢিয়াই নিয়া এ এছ-০২ এ চি-০৮৪১ নম্বৰৰ টাটা মেজিক গাড়ীখনক একে দিশেৰে তীব্ৰ বেগত গৈ থকা এ এছ-০১ এম বি-৩৮০৩ নম্বৰৰ মাৰুতি ছুইফ্‌ট গাড়ীখনে পিছফালৰ পৰা খুন্দা মাৰে ।

ফলত মেজিকখনে নিয়ন্ত্ৰণ হেৰুৱাই দ খাৱৈত সোমাই পৰে । উল্লেখ্য যে দুৰ্ঘটনাত পতিত হোৱা ছুইফ্‌ট গাড়ীখনতো কেইবাজনো যাত্ৰী আছিল । দুৰ্ঘটনাটোৰ ফলত দুয়োখন গাড়ীৰ প্ৰায় ১৮জন যাত্ৰী আহত হৈছে ।

পাছত স্থানীয় লোকৰ সহযোগত আহত আটাইকেইজনকে নগাঁও ভোগেশ্বৰী ফুকননী অসামৰিক চিকিৎসালয়ত ভৰ্তি কৰায় ।

আহতসকলৰ ভিতৰত কেইবাজনৰো অৱস্থা সংকটজনক বুলি জানিব পৰা গৈছে ।