বটদ্ৰৱাত সুধাকণ্ঠৰ জন্মদিনত বিশ্ব সাক্ষৰতা তথা হাতধোৱা দিৱস উদ্‌যাপন

নগাঁও জিলাৰ বটদ্ৰৱা শিক্ষা খণ্ডৰ অধীনৰ বটদ্ৰৱা এলেকাৰ বিভিন্ন বিদ্যালয়ত শনিবাৰে সুধাকণ্ঠ ডঃ ভূপেন হাজৰিকাৰ জন্ম দিৱসটি পালন কৰা হয় ৷ ইয়াৰ লগত সংগতি ৰাখি উদ্‌যাপন কৰা হয় বিশ্ব হাতধোৱা দিৱসৰ লগতে সাক্ষৰতা দিৱস ৷ 

বটদ্ৰৱা মণ্ডল সমল শিক্ষা খণ্ডৰ খণ্ড সমল শিক্ষা সমন্বয়ক ৰামপ্ৰসাদ নাথৰ তত্ত্বাৱধানত বিদ্যালয়সমূহৰ কণ কণ শিশুসকলৰ পৰা আৰম্ভ কৰি শিক্ষক-শিক্ষয়িত্ৰী তথা কৰ্মচাৰী আৰু অভিভাৱকসকলে আজিৰ এই অনুষ্ঠানত অংশগ্ৰহণ কৰি বিশ্ববন্দিত শিল্পীগৰাকীলৈ সশ্ৰদ্ধ প্ৰণিপাত নিবেদন কৰে ৷

 বটদ্ৰৱা বালিকা বুনিয়াদী বিদ্যালয়ত ছাত্ৰ-ছাত্ৰীসকলে ভূপেন হাজৰিকালৈ শ্ৰদ্ধাঞ্জলি জনাই তেখেতৰ অমৰ সৃষ্টি 'মানুহে মানুহৰ বাবে যদিহে অকণো নেভাবে…' শীৰ্ষক গীতটো সমস্বৰে পৰিবেশন কৰি সমগ্ৰ বাতাবৰণ সংগীতময় কৰি তোলে ৷ 

ইয়াৰোপৰি বটদ্ৰৱা চি আৰ চিৰ অধীনৰ প্ৰতিখন বিদ্যালয়তে আজি ছাত্ৰ-ছাত্ৰীসকলে অসম ৰত্ন, যাযাবৰী শিল্পীগৰাকীৰ প্ৰতিচ্ছবিত বন্তি প্ৰজ্জ্বালন, পুষ্পাঞ্জলি অৰ্পণ কৰি তেখেতলৈ শ্ৰদ্ধা নিবেদন কৰে ৷ বিদ্যালয়সমূহত মণ্ডল সমল শিক্ষা সমন্বয়ক ৰামপ্ৰসাদ নাথ উপস্থিত হৈ শিক্ষাৰ্থীসকলক সুধাকন্ঠৰ জীৱন পৰিক্ৰমা সম্পৰ্কে বিশদভাৱে অৱগত কৰে ৷ 

ইপিনে আজি বটদ্ৰৱা মণ্ডল সমল শিক্ষা খণ্ডৰ অন্তৰ্গত বিদ্যালযসমূহত বিশ্ব হাতধোৱা দিৱসৰ লগতে বিশ্ব সাক্ষৰতা দিৱসটিও পালন কৰা হয় ৷ এই উদ্দেশ্যে ছাত্ৰ-ছাত্ৰীক খাদ্য গ্ৰহণ কৰাৰ পূৰ্বে কি পদ্ধতিৰে হাত চাফা কৰিব লাগে সেয়া দেখুৱাই দিয়াৰ লগতে দিৱস দুটাৰ তাৎপৰ্য বুজাই দিয়ে শিক্ষাগুৰুসকলৰ লগতে সংশ্লিষ্ট চি আৰ চিয়ে ৷