শিক্ষা সংসদৰ ঘোষণা,মাৰ্চৰ প্ৰথম সপ্তাহৰ পৰা উচ্চতৰ মাধ্যমিক চূড়ান্ত পৰীক্ষা

ইংৰাজী নৱবৰ্ষৰ প্ৰথম দিনটোতে ৰাজ্যৰ লাখ-লাখ শিক্ষাৰ্থীৰ বাবে ভাল খবৰ দিলে উচ্চতৰ মাধ্যমিক শিক্ষা সংসদে।২০২১বৰ্ষৰ উচ্চতৰ মাধ্যমিকৰ চূড়ান্ত পৰীক্ষা মাৰ্চৰ প্ৰথম সপ্তাহৰ পৰা অনুষ্ঠিত হ'ব।কলা, বিজ্ঞান ,বাণিজ্য-তিনিওটা শাখাৰে পৰীক্ষা অনুষ্ঠিত হ'ব।পৰীক্ষাত যাতে কোনো বিসংগতি নহয়,তাৰ প্ৰতি লক্ষ্য ৰাখি পৰীক্ষা সুচাৰুৰূপে সম্পাদন কৰিবলৈ যাৱতীয় প্ৰস্তুতি আৰম্ভ কৰিছে শিক্ষা সংসদে।সংসদৰ সচিব ড: ৰমেশ চন্দ্ৰ চুতীয়াৰ নেতৃত্বত উচ্চ পৰ্যায়ৰ কমিটী ইতিমধ্যে গঠন কৰা হৈছে।৩১ডিচেম্বৰত শিক্ষা সংসদৰ কাৰ্যালয়ত এই বিষয়ত আলোচনা সন্দৰ্ভত অনুষ্ঠিত হয় এখন বৈঠক।

বৈঠকত বহুকেইটা গুৰুত্বপূৰ্ণ ইতিবাচক দিশ সন্দৰ্ভত আলোচনা কৰা হয়। উল্লেখ যে মহামাৰী ক'ৰ'না ভাইৰাছৰ বাবে শিক্ষানুষ্ঠান বন্ধ হৈ থকাৰ পৰিপ্ৰেক্ষিতত পৰীক্ষাৰ্থীসকলৰ ভৱিষ্যতৰ কথা চিন্তা কৰি চলিত বর্ষত ৩০শতাংশ পাঠ্যক্ৰম হ্ৰাস কৰিছে শিক্ষা সংসদে।

ইফালে,বিগত বৰ্ষসমূহত স্বচ্ছভাৱে পৰীক্ষা অনুষ্ঠিত কৰিবলৈ নোৱাৰা কেন্দ্ৰসমূহৰ বাতিল হ'ব স্বীকৃতি।অৰ্থাৎ কৰ্তন হ'ব এইসমূহ পৰীক্ষা কেন্দ্ৰ।তদুপৰি প্ৰথমবাৰৰ বাবে পৰীক্ষা কেন্দ্ৰৰ দায়িত্বত থকা শিক্ষানুষ্ঠানৰ মুৰব্বীয়ে দক্ষতাৰ ওপৰত লিখিত পত্ৰত স্বাক্ষৰ কৰি প্ৰদান কৰিব লাগিব শিক্ষা সংসদৰ সচিবক।এই কথা জনালে সচিব চুতীয়াই।প্ৰতিটো পৰীক্ষা কেন্দ্ৰত সুউচ্চ দেৱাল, চিচিটিভি, নিকটৱৰ্তী ডাকঘৰ, চিকিৎসালয় থকাটো বাধ্যতামূলক।উক্ত নীতি-নিয়ম নথকা বহু পৰীক্ষা কেন্দ্ৰই পৰীক্ষা পৰিচালনাৰ পৰা বাদ পৰিব বুলি স্পষ্ট কৰিছে শিক্ষা সংসদৰ সচিব ড: চুতীয়াই। শৈক্ষিক অনুমতি আৰু স্বীকৃতিৰ ক্ষেত্ৰতো আগন্তুক দিনবোৰত সংস্কাৰ আহিব। বিষয়া-কৰ্মচাৰীৰ পদোন্নতিৰ পৰা নিযুক্তিলৈ এটা আশাৰ বতৰা কঢ়িয়াই আনিব।

পূৰ্বৰ দৰে শীৰ্ষ ১০টা স্থানেই বাহাল থাকিব পৰীক্ষাত।এই কথা জানিবলৈ দিয়ে শিক্ষা সংসদৰ অধ্যক্ষ ড: দয়ানন্দ বৰগোহাঁইয়ে ।