নগাঁৱত ভুৱা সোণৰ নাওসহ তিনিজনক গ্ৰেপ্তাৰ 

নগাঁৱৰ পৰা ৱাহিদুদ জামান:

নগাঁও আৰক্ষীয়ে ৩১ জানুৱাৰীৰ নিশা নিয়মীয়া তালাচীৰ সময়ত এখন সোণৰ ভুৱা নাওসহ তিনিজন লোকক গ্ৰেপ্তাৰ কৰিবলৈ সক্ষম হয়। নগাঁও চহৰৰ মৰিকলং আৰক্ষীয়ে মৰিকলং পেট্ৰল পাম্পৰ ওচৰত সন্দেহজনকভাৱে ঘূৰি ফুৰা তিনিজন লোকক তালাচী চলোৱাত সমগ্ৰ বিষয়টো পোহৰলৈ আহে। পাছত আৰক্ষীয়ে ভুৱা সোণৰ নাওখন জব্দ কৰাৰ লগতে চক্ৰটোৰ তিনিওজন সদস্যক গ্ৰেপ্তাৰ কৰে। আৰক্ষীয়ে গ্ৰেপ্তাৰ কৰা লোক তিনিজন হ'ল লক্ষীমপুৰ জিলাৰ বিহপুৰীয়া আৰক্ষী থানাৰ অন্তৰ্গত সোণাপুৰ ৰিজাৰ্ভ গাঁৱৰ জিয়াবুৰ ৰহমান, ইক্ৰামুল ইছলাম আৰু জিয়াবুৰ আহমদ।

আৰক্ষীয়ে জব্দ কৰা নাওখনৰ ওজন প্ৰায় ১.৫ কি: গ্ৰাম হ'ব। আৰক্ষী সুত্ৰে জানিব পৰা মতে, এই লোককেইজনে নাওখন নগাঁৱৰ কোনো লোকক বিক্ৰী কৰাৰ লক্ষ্যৰে এখন নৈশ বাছেৰে আহি নগাঁৱৰ বৰঘাট বাইপাছত গাড়ীৰ পৰা নামে।পিছত তেওঁলোক নগাঁও চহৰৰ দিশে আহি থকা অৱস্থাত মৰিকলঙৰ ওচৰত আৰক্ষীয়ে তালাচীৰ সময়ত তেওঁলোকক গ্ৰেপ্তাৰ কৰে। এই সন্দৰ্ভত নগাঁও আৰক্ষীয়ে নগাঁও সদৰ থানাত এটা গোচৰ ৰুজু কৰি তদন্ত অব্যাহত ৰাখিছে।