কংগ্ৰেছৰ নিৰ্বাচনী ইছ্যু হ’ব মোডী চৰকাৰৰ ৰাফেল ক্ৰয় কেলেংকাৰী

দেশৰ প্ৰতিৰক্ষা বিভাগে ফ্ৰান্সৰ পৰা যুদ্ধ বিমান ৰাফেল ক্ৰয় কৰাক লৈ তীব্ৰ জোকাৰণিৰ সৃষ্টি কৰিছে দেশৰ ৰাজনীতিত ৷ কংগ্ৰেছে ৰাফেল বিমান ক্ৰয় মোডী চৰকাৰৰ অন্যতম বৃহৎ কেলংকাৰী বুলি অভিযোগ উত্থাপন কৰিছে ৷

দেশৰ প্ৰতিৰক্ষা খণ্ডত সৰ্ববৃহৎ দুৰ্নীতি বুলি অভিহিত কৰি কংগ্ৰেছ অধ্যক্ষ ৰাহুল গান্ধীয়ে ৰাফেল ক্ৰয় কেলেংকাৰীক মোডী চৰকাৰৰ বিৰুদ্ধে ৰাজনৈতিক ইছ্যু হিচাপে গ্ৰহণ কৰা পৰিলক্ষিত হৈছে ৷ লোকসভাৰ মজিয়াত এই বিষয়টো উত্থাপন কৰিলে ৰাহুল গান্ধীয়ে ৷

শেহতীয়াভাৱে ৰাফেল বিমান ক্ৰয়ৰ বিষয়টো পোহৰলৈ আনি বিতৰ্কৰ সৃষ্টি কৰিলে অনিল আম্বানীয়ে ৷ অনিল আম্বানীয়ে কংগ্ৰেছ অধ্যক্ষ ৰাহুল গান্ধীলৈ এক পত্ৰৰ জৰিয়তে ৰাফেল ক্ৰয়ক লৈ কংগ্ৰেছে ভুল বক্তব্য প্ৰকাশ কৰিছে বুলি জনাইছিল ৷

ৰাফেল ক্ৰয়ৰ বিষয়টোৰ লগত কংগ্ৰেছৰ বহুকেইজন নেতাই ৰিলায়েন্সৰ অনিল আম্বানিক সাঙুৰি অভিযোগ উত্থাপন কৰাত অনিল আম্বানিয়ে কংগ্ৰেছ নেতৃবৰ্গলৈ আইনগত জাননী প্ৰেৰণ কৰিছে ৷

ৰিলায়েন্সৰ পৰা আইনী জাননী লাভ কৰাৰ লগে লগে কংগ্ৰেছ নেতৃবৰ্গ অগ্নিশৰ্মা হৈ পৰে ৷ ৰাহুল গান্ধীয়ে জাননী লাভ কৰা কংগ্ৰেছ নেতাসকলক মাতি নতুন দিল্লীত আলোচনা কৰে আৰু সকলোকে অভয় দান কৰে ৷

কংগ্ৰেছ অধ্যক্ষগৰাকীয়ে ৰাফেল কেলেংকাৰীক লৈ অধিক প্ৰচাৰ কৰাৰ বাবেহে সিদ্ধান্ত প্ৰকাশ কৰে ৷ দুৰ্নীতিমুক্ত বুলি প্ৰচাৰ চলোৱা মোডী চৰকাৰৰ বিৰুদ্ধে প্ৰতিৰক্ষা খণ্ডত সৰ্ববৃহৎ কেলেংকাৰী হিচাপে ৰাফেল বিমান ক্ৰয়ৰ বিষয়টোক ইছ্যু হিচাপে থিয় কৰাৰ নিৰ্দেশ দিছে ৰাহুল গান্ধীয়ে ৷

মোডী চৰকাৰে আনুমানিকভাৱে এই বিষয়টোৰ আঁৰত বিৰোধী আশ্বস্ত হ’ব পৰাকৈ স্পষ্টীকৰণ দিব পৰা নাই ৷ ফলত বিজেপিৰ ভিতৰৰ পৰাও জ্যেষ্ঠ নেতাসকলে প্ৰতিবাদ আৰম্ভ কৰিবলৈ বাধ্য হৈছে ৷

বিজেপিৰ বৰ্ষীয়ান নেতা অৰুণ শ্ব'ৰী, যশবন্ত সিনহাৰ লগতে আইনজ্ঞ প্ৰশান্ত ভূষণে বেচৰকাৰী সংস্থাৰ উদ্যোগত ৰাফেল বিমান ক্ৰয় কৰা বিষয়টোত অভিযোগ কৰিছে ৷ অৰুণ শ্বে'ৰী আৰু যশবন্ত সিনহাই ৰাজীৱ গান্ধী চৰকাৰৰ দিনৰ ব'ফৰ্ছ কেলংকাৰীতকৈ ৰাফেল ক্ৰয় কেলেংকাৰী বৃহৎ বুলি মত প্ৰকাশ কৰিছে ৷

ৰাফেল কেলেংকাৰীৰ মূল অভিযোগটো হ’ল- মনমোহন সিং চৰকাৰে ২০১২ চনত ফৰাচী সংস্থা দাসো এভিয়েচনৰ সৈতে বায়ুসেনাৰ বাবে ১২৬খন ৰাফেল যুদ্ধ বিমান ক্ৰয় কৰাৰ সিদ্ধান্ত গ্ৰহণ কৰিছিল ৷

ইউ পি এ চৰকাৰে সিদ্ধান্ত গ্ৰহণ কৰিছিল যে ১৮খন বিমান ফ্ৰান্সৰ পৰা ক্ৰয় কৰিব আৰু বাকী ১০৮খন ভাৰতত ৰাজহুৱা খণ্ডৰ প্ৰতিষ্ঠান হিন্দুস্তান এৰ’নেটিক্সৰ সৈতে যৌথভাৱে নিৰ্মাণ কৰিব ৷ মোডী চৰকাৰ আহি ৰাফেল ক্ৰয়ৰ চুক্তিৰ পৰিৱৰ্তন কৰিলে ৷

৩৬খন বিমান ক্ৰয়ৰ সিদ্ধান্ত গ্ৰহণ কৰিলে আৰু বাকী বিমানৰ ক্ষেত্ৰত ৰাজহুৱা খণ্ডৰ প্ৰতিষ্ঠান হিন্দুস্তান এৰ’নেটিক্স লিমিটেডৰ পৰিৱৰ্তে অনিল আম্বানীৰ ৰিলায়েন্স ডিফেন্সৰ দ্বাৰা নিৰ্মাণ কৰাৰ সিদ্ধান্ত গ্ৰহণ কৰিলে ৷

ব্যক্তিগত কোম্পানী ৰিলায়েন্স ডিফেন্সক বিমানসমূহ তদাৰক কৰাৰো দায়িত্ব দিব বিচৰা হ’ল ৷ কংগ্ৰেছৰ অভিযোগ মতে, যিখন ৰাফেল বিমানৰ দাম মনমোহন সিং চৰকাৰে ৫২৬.১০ কোটি টকা নিৰ্ধাৰণ কৰিছিল সেইখন বিমান এতিয়া মোডী চৰকাৰে ১৬৭০.৭০ কোটি টকাত ক্ৰয় কৰাৰ চুক্তি কৰিছে ৷

কংগ্ৰেছৰ ৰাজহুৱা প্ৰশ্ন- এখন ৰাফেল বিমানৰ বাবে অতিৰিক্ত ১১৪৪.৬০ কোটি টকা কিয় নিৰ্ধাৰণ কৰিলে মোডী চৰকাৰে ৷ এই প্ৰসঙ্গই দেশৰ ৰাজনীতি তোলপাৰ কৰাৰ সম্ভাৱনা প্ৰকট হৈ পৰিছে ৷

কেন্দ্ৰীয় চৰকাৰে প্ৰতিৰক্ষাৰ বিষয়টো গোপনীয় বুলি বিষয়বস্তুৰ পৰা আঁতৰিবলৈ চেষ্টা কৰিব পাৰে ৷ এনে ক্ষেত্ৰত কংগ্ৰেছৰ স্থিতি লক্ষ্য কৰিবলগা হ’ব ৷