দেশৰ সবাতোকৈ ধনী আঞ্চলিক দল শিৱসেনা, শতাংশ হিচাপত অগপলৈ সৰ্বাধিক বৰঙণি

'এছ'চিয়েচন ফৰ ডেম'ক্ৰেটিক ৰিফৰ্মছ' (এ ডি আৰ)ৰ এক প্ৰতিবেদনমতে, ২০১৬-১৭ বিত্তীয় বৰ্ষত দেশৰ সকলো আঞ্চলিক দলৰ ভিতৰত শিৱসেনা হ'ল সৰ্বাধিক বৰঙণি লাভ কৰা দল ৷

ভাৰতীয় নিৰ্বাচন আয়োগৰ ওচৰত দলসমূহে দাখিল কৰা তথ্যৰ ওপৰত ভিত্তি কৰি এই প্ৰতিবেদন প্ৰস্তুত কৰা হৈছে ৷ মহাৰাষ্ট্ৰৰ শিৱসেনাই এই সময়ছোৱাত মুঠ ২৯৭টা উৎসৰ পৰা ২৫.৬৫ কোটি টকা বৰঙণি লাভ কৰে ৷

আনহাতে, দিল্লীৰ আম আদমী পাৰ্টীয়ে ঘোষণা কৰা তথ্যমতে, ৩,৮৬৫টা উৎসৰ পৰা মুঠ ২৪.৭৩ কোটি টকা বৰঙণি লাভ কৰি তালিকাৰ দ্বিতীয় স্থানত আছে ৷ তৃতীয় সৰ্বাধিক বৰঙণি লাভ কৰা দলটো হ'ল পঞ্জাবৰ শিৰোমণি আকালি দল ৷ দলটোৱে লাভ কৰা মুঠ বৰঙণিৰ পৰিমাণ হ'ল ১৫.৪৫ কোটি ৷

অৱশ্যে শিৱসেনাই ২০১৫-১৬ বৰ্ষত মুঠ ৬১.১৯ কোটিৰ পৰা ৭০ শতাংশ বৰঙণি বিভিন্ন উৎসই দিবলৈ অস্বীকাৰ কৰা প্ৰত্যক্ষ কৰে ৷ আনহাতে, এই সময়ছোৱাত শতাংশ হিচাপত সৰ্বাধিক বৰঙণি লাভ কৰা দল হ'ল অসম গণ পৰিষদ আৰু কৰ্ণাটকৰ জনতা দল (ছেকুলাৰ) ৷

অগপই লাভ কৰা বৰঙণি আছিল ০.৪৩ কোটি, অৰ্থাৎ পূৰ্ববৰ্তী বছৰতকৈ ৭,১৮৩ শতাংশ বৃদ্ধি হয় ৷ আনহাতে, জেডিএছে লাভ কৰে ৪.২ কোটি, বৃদ্ধিৰ হাৰ পূৰ্ববৰ্তী বছৰতকৈ ৫৯৬ শতাংশ ৷ আমোদজনকভাৱে সুদীৰ্ঘ বছৰৰ মূৰত এই দুয়োটা দলে শেহতীয়াভাৱে শাসনলৈ আহিছে ৷

আঞ্চলিক দলসমূহে ঘোষণা কৰা বৰঙণিৰ মুঠ পৰিমাণ হ'ল ৬,৩৩৯টা উৎসৰ পৰা ৯১.৩৭ কোটি ৷ ইয়াৰে ৭২.০৫ শতাংশ অৰ্থাৎ ৬৫.৮২ কোটি তিনিটা দল ক্ৰমে শিৱসেনা, আপ আৰু শিৰোমণি আকালি দলে অকলেই লাভ কৰিছে ৷

এ ডি আৰ প্ৰতিবেদনত প্ৰকাশ পোৱা অনুযায়ী, আঞ্চলিক দলসমূহে প্ৰকাশ কৰা মুঠ বৰঙণিৰ ২,৮২ কোটি অৰ্থাৎ ৩.০৯ শতাংশ মুঠ ১,৯১৯ উৎসৰ পৰা নগদ ধন হিচাপে লাভ কৰিছে ৷

সৰ্বাধিক নগদ ধন হিচাপে বৰঙণি লাভ কৰা প্ৰথম দল তিনিটা হ'ল পুডুচেৰীৰ এ আই এন আৰ চি, অগপ আৰু নাগালেণ্ডৰ এন পি এফ ৷ লাভ কৰা নগদ বৰঙণিৰ পৰিমাণ হ'ল ক্ৰমে ৬৫ লাখ, ৪১.২ লাখ আৰু ৪১ লাখ ৷

সকলো ৰাজ্যৰ ভিতৰত অসমৰ দাতাই সৰ্বাধিক পৰিমাণৰ ৭২.৭ লাখ টকা নগদ হিচাপে দান কৰিছে ৷ আনহাতে, পুডুচেৰীৰ দাতাই ৬৫.৩ লাখ টকা নগদ ধন দান কৰিছে ৷

সৰ্বাধিক বৰঙণি ২০.৮৬ কোটি টকা আহিছে দিল্লীৰ পৰা ৷ ইয়াৰ পিছত ক্ৰমে মহাৰাষ্ট্ৰৰ পৰা ১৯.৭ কোটি আৰু পঞ্জাবৰ পৰা আহিছে ৯.৪২ কোটি টকা ৷