সোণাৰিত তপন গগৈক অকৰ্মণ্য আখ্যা দিলে জ্যেষ্ঠ কংগ্ৰেছ নেতাই

সোণাৰিৰ পৰা ঘন বৰা

চৰাইদেউ জিলাৰ সোণাৰি সমষ্টিত কংগ্ৰেছৰ ভেটি পুনৰ মজবুত কৰিবৰ বাবে সমষ্টিটোৰ প্ৰাক্তন বিধায়ক তথা  প্ৰাক্তন মন্ত্ৰী শৰৎ বৰকটকী নিৰ্বাচনী প্ৰচাৰত ব্যস্ত হৈ পৰিছে। বৰকটকীয়ে নিৰ্বাচনী প্ৰচাৰ চলোৱাৰ পিছতেই বিজেপিৰ প্ৰাৰ্থী তপন গগৈৰ ৱাৰ্ডৰ পৰাই সাতজন চাহ শ্ৰমিকে বিজেপি এৰি কংগ্ৰেছত যোগদান কৰে।

সোণাৰি কংগ্ৰেছৰ মুখ্য নিৰ্বাচনী কাৰ্যালয়ত অনুষ্ঠিত  এই যোগদান কাৰ্যসূচীত  শৰৎ বৰকটকীয়ে তপন গগৈক অকৰ্মণ্য বুলি আখ্যা দিয়ে।তদুপৰি প্ৰধানমন্ত্ৰী নৰেন্দ্ৰ মোডী আগন্তুক লোকসভা  নিৰ্বাচনত নিজে হৰাৰ লগতে তেওঁৰ দল হৰাৰ আশংকাত শুকাই-খিনাই যোৱা বুলি মন্তব্য কৰে।

অসমৰ পৰা সাতখনকৈ অধিক আসন লাভ কৰাৰ উপৰিও যোৰহাট সমষ্টি কংগ্ৰেছে লাভ কৰিব বুলি তেওঁ কয়। চৰাইদেউ জিলা কংগ্ৰেছৰ সম্পাদক উৎপল গগৈৰ তত্বাৱধানত উক্ত সভাত সাতজন বিজেপি কৰ্মীয়ে কংগ্ৰেছত যোগদান কৰে।

যোগদান কৰা বিজেপি কৰ্মীসকল হৈছে কিষান মৰ্চাৰ সভাপতি বৰণ ভূমিজ,উপ-সভাপতি বসু মূৰী, সহ-সম্পাদক বিজয় ভূমিজ,সদস্যক্ৰমে মহেশ ভূমিজ,দীপক নায়ক,পূৰণ তাঁতী আৰু ৰিয়াকসন তেঁৱা।