হাউলীত পথ দুৰ্ঘটনা : অগপ কেন্দ্ৰীয় মহিলা পৰিষদৰ নেত্ৰীসহ দুজন নিহত

বৰপেটাৰোডৰ পৰা ৰনজিৎ তালুকদাৰ 

বৰপেটা জিলাৰ হাউলী পথৰ কদমগুৰীত আজি দিনৰ ১০ বজাত এক ভয়ংকৰ পথ দুৰ্ঘটনা সংঘটিত হয়৷ উক্ত দুৰ্ঘটনাত থিতাতে মৃত্যু হয় অগপৰ কেন্দ্ৰীয় মহিলা পৰিষদৰ নেত্ৰী গীতাঞ্জলি দাস(আপেল) আৰু বৰপেটা উপায়ুক্ত কাৰ্যালয়ৰ কৰ্মচাৰী জীতেন বর্মনৰ৷বৰপেটাত অসম গণ পৰিষদৰ জাতিধ্বংসী বিধেয়ক বিৰোধী 'প্ৰতিবাদী গণ সমদল'ত অংশগ্ৰহণ কৰিবলৈ আহি  পথ দুৰ্ঘটনাত মৃত্যু হয় গীতাঞ্জলী দাসৰ৷

দাস থকা গাড়ীখনৰে ডাম্পাৰ এখনৰ মুখামুখি সংঘৰ্ষ হয়৷ দাসৰ ঘৰ বৰপেটাৰোডৰ ১০ নম্বৰ ৱাৰ্ডত৷ তেওঁ দুটা সন্তানৰ মাতৃ আছিল। মৃত জীতেন বৰ্মনৰ ঘৰ বৰপেটাৰোডৰ মিলন নগৰত৷ বৰ্মন এটি কন্যা সন্তানৰ পিতৃ আছিল৷ উক্ত ঘটনাৰ বাবে বৰপেটাৰোডত শোকৰ ছাঁ পৰে।