বিশ্বনাথৰ যুৱকৰ প্ৰসংশনীয় পদক্ষেপ : শিশু দিৱস উপলক্ষে খাদ্য-সামগ্ৰী বিতৰণ

বিশ্বনাথ চাৰিআলিৰ পৰা ভাস্কৰ দাস

পণ্ডিত জৱাহৰলাল নেহৰুৰ ১২৯ সংখ্যক জন্মজয়ন্তী উপলক্ষে বিশ্বনাথ চাৰিআলিৰ সচেতন যুৱক শিৱম সাগৰ কাশ্যপ, সৌৰভজ্যোতি বৰা, ভূচিত্ৰ দাধৰা, দাদুল দাস, জয়ন্ত দাস, নিকু বৰা আৰু ভাস্কৰ জ্যোতি দাসে বিশ্বনাথ চাৰিআলিৰ বালিপুখুৰীস্থিত বিকলাংগ ছাত্ৰ-ছাত্ৰীৰ বিশেষ বিদ্যালয় আৰু অন্যভাৱে সক্ষম শিশুৰ এক বিশেষ অনুষ্ঠান ৰেঙনিৰ আবাসগৃহৰ শিশুসকলৰ মাজত খাদ্য-সামগ্ৰী বিতৰণ কৰে ।

উল্লেখযোগ্য যে এই যুৱককেইজনে সম্পূৰ্ণ নিজা প্ৰচেষ্টাৰে নিজৰ সাঁচতীয়া ধন খৰচ কৰি বিগত পাঁচ বছৰ ধৰি এনেদৰে ছাত্ৰ-ছাত্ৰীৰ মাজত শিক্ষাৰ সামগ্ৰীৰ লগতে খাদ্য-সামগ্ৰী বিতৰণ কৰি আহিছে ।

বৰ্তমান সময়ত যুৱ উচ্ছৃংখলতাৰ বাতৰিয়ে শিৰোনাম দখল কৰি অহাৰ লগতে এচাম নৱপ্ৰজন্ম বিভিন্ন নিচাযুক্ত বস্তু সেৱন কৰি নিজে বিপথে পৰিচালিত হোৱাৰ উপৰি অসামাজিক কামত লিপ্ত হৈ সমাজত অশান্তি সৃষ্টি কৰাৰ লগতে নিজকে অন্ধকাৰলৈ ঠেলি লৈ গৈছে, সেই সময়ত এই যুৱককেইজনৰ এনে পদক্ষেপক সচেতন ৰাইজে বিপুল আদৰণি জনাইছে ।