বৰ্ষীয়ান লেখক অৱনী বৰঠাকুৰৰ আত্মজীৱনী “অভিজ্ঞতাৰ আলোকত এজন কমিউনিষ্ট কৰ্মীৰ স্মৃতি কথা” উন্মোচন

দেশৰ ৰাজনৈতিক সমাজ ব্যৱস্থাক পুঁজিবাদে গ্ৰাস কৰাৰ সময়তে প্ৰবীণ বাঁওপন্থী নেতা তথা বিশিষ্ট লেখক অৱনী বৰঠাকুৰে লিখি উলিয়াইছে "অভিজ্ঞতাৰ আলোকত এজন কমিউনিষ্ট কর্মীৰ স্মৃতি কথা" নামৰ আত্মজীৱনী । ৯০ বছৰীয়া লেখকগৰাকীয়ে লিখি উলিওৱা আত্মাজীৱনীখন আজি উন্মোচন কৰে গুৱাহাটী মহানগৰীৰ ৰাজ্যিক সংগ্ৰহালয় কনকলাল বৰুৱা প্ৰেক্ষাগৃহত ।

দিনৰ ১১ বজাত আখৰ প্ৰকাশনে প্ৰকাশ কৰি উলিওৱা বৰ্ষিয়ান লেখকগৰাকীৰ গ্ৰন্থখন উন্মোচন কৰে বিশিষ্ট বুদ্ধিজীৱী ডঃ হীৰেন গোহাঁয়ে । বিশিষ্ট সাংবাদিক অজিত কুমাৰ ভূঞাই সভাপতিত্ব কৰা গ্ৰন্থ উন্মোচনী সভাখনত উপস্থিত থাকে অসমীয়া প্ৰতিদিন কাকতৰ সম্পাদক নিত্য বৰা,  কটন কলেজৰ প্ৰাক্তন অধ্যাপক উদয়াদিত্য ভৰালী প্ৰমুখ্যে বহুত গণ্য-মান্য ব্যক্তি ।

ইফালে আকৌ গুৱাহাটী প্ৰেছ ক্লাবত দিনৰ ১ বজাত বিশিষ্ট নাট্যকাৰ অভিজিৎ ভট্টাচাৰ্যৰ ২০১৭-১৮ বর্ষ অন্যতম শ্রেষ্ঠ নাট "মানুহ খোৱা বাঘ"ক গ্ৰন্থাকাৰে উন্মোচন কৰা হয় । বিশিষ্ট অভিনেতা যোগেশ কাশ্যপে লিখি উলিওৱা গ্ৰন্থখন উন্মোচন কৰে অভিনেতা মৃদুল ভূঞাই । উক্ত অনুষ্ঠানত উপস্থিত থাকে বিশিষ্ট নাট্যকাৰ অভিজিৎ ভট্টাচাৰ্য । উল্লেখযোগ্য যে যোৱাবর্ষত ইতিহাস থিয়েটাৰত দর্শকৰ বিপুল সমাদৰ লাভ কৰিছিল নাটকখনে ।