কলিয়াবৰত  অচিন পোকে নিদ্ৰা হৰণ কৰিছে কৃষকৰ

কলিয়াবৰৰ পৰা প্ৰদীপ লস্কৰ

কলিয়াবৰত ধাননি পথাৰত অচিন পোকৰ সন্ত্ৰাস । কৃষকৰ সপোনৰ ধাননিডৰা এতিয়া  এজাক অচিন পোকে এফালৰ পৰা খাই তহিলং কৰিছে ।  নিশাৰ ভিতৰতে  বিঘাই বিঘাই ধাননি পথাৰত আক্ৰমণ কৰি নিঃশেষ কৰি পেলাইছে এফালৰ পৰা ।

আহিনৰ সজাল ধৰা ধাননিত অচিন পোকৰ আক্ৰমণে সংকিত কৰি তুলিছে কলিয়াবৰৰ কৃষকক । বিশেষকৈ বামুণী, মথৌখাট, মাজগাঁও, দলগাঁও আদি গাঁৱৰ ধাননি পথাৰত পোকৰ আক্ৰমণে জটিল ৰূপ ধাৰণ কৰিছে ।

স্থানীয় লোকে ধানগছত উপদ্ৰৱ চলোৱা এই পোকবিধক এই পৰ্যন্ত  চিনাক্ত কৰিব পৰা নাই । ধানৰ পাতৰ ভিতৰত অসংখ্য  কণী পৰিলক্ষিত হোৱাত কৃষক ৰাইজ আতংকিত হৈ পৰিছে । পোকৰ সংক্ৰমণ ৰোধৰ বাবে কৃষকে কৃষি বিভাগৰ ওচৰ চাপিছে যদিও কোনোধৰণৰ সঁহাৰি লাভ কৰিবলৈ সক্ষম হোৱা নাই ।

উপায়ন্তৰ হৈ নিজাকৈয়ে ব্যৱস্থা গ্ৰহণ কৰিছে কৃষকে । এই ক্ষেত্ৰত কৃষি বিভাগৰ দৰে এটা বিয়াগোম বিভাগ থকাৰ পাছতো কৃষক ৰাইজে কোনোধৰণৰ সুবিধা নোপোৱাটো বিভাগটোৰ এক চৰম বিফলতা বুলি মন্তব্য আগবঢ়াইছে সাধাৰণ ৰাইজে ।