বন বিভাগৰ চালান নীতি সংশোধনৰ বাবে ১৫ দিনৰ সময়সীমা পৰিমল শুক্লবৈদ্যক

আজি গুৱাহাটী প্ৰেছ ক্লাবত বন বিভাগে বাহনৰ পৰিবহণ ক্ষমতা অনুযায়ী শিল-বালিৰ চালানৰ ব্যৱস্থাৰ দাবীত অসম জাতীয়তাবাদী উন্নয়ন পৰিষদ, কৃষক শ্ৰমিক উন্নয়ন পৰিষদ আৰু সদৌ অসম গৰিয়া-মৰীয়া যুৱ-ছাত্ৰ পৰিষদে এক সংবাদমেল সম্বোধন কৰে ।

সংবাদমেলত তেওঁলোকৰ দাবী, বন বিভাগে সকলো গাড়ীকে একেই চালান প্ৰদান কৰে । এখন ডাম্পাৰ বা তাৰ সমপৰ্যায়ৰ এখন ট্ৰাকক সামগ্ৰী কঢ়িওৱাৰ বাবে যি পৰিমাণৰ চালান কাটি দিয়ে সেই একে পৰিমাণৰ চালান দিয়ে এখন ট্ৰেক্টৰ বা ডি আই পৰ্যায়ৰ গাড়ীৰ ক্ষেত্ৰতো ।

তেওঁলোকৰ অভিযোগ, বন বিভাগে নিৰ্দিষ্ট কৰি লৈছে যে প্ৰতিখন গাড়ীয়ে যিমান পৰিমাণৰ সামগ্ৰীয়ে কঢ়িয়াই নিনিয়ক কিয়, বিভাগটোৱে প্ৰদান কৰে ১০ চিএমৰ চালান । তাৰফলত এখন ডাম্পাৰে যদি ২৪ চিএম বালি বা শিল কঢ়িয়াই আনে তেতিয়া মাত্ৰ ১০ চিএমৰ কৰহে চৰকাৰৰ ঘৰত দিব লাগে ৷

বাকী ১৪ চিএমৰ কৰ তেওঁলোক দিব লাগে ৰাস্তাত থকা তালাচী চকীসমূহত । ঠিক একেদৰে এখন ডি আই গাড়ীয়ে যদি শিল বা বালি ৫ চিএম কঢ়িয়াই আনে তেতিয়াও সেই গাড়ীখনে চৰকাৰৰ ঘৰত কৰ হিচাপে দিব লাগে ১০ চিএমৰ এই কৰ ।

ইয়াৰ ফলত গাড়ীৰ গৰাকী আৰু ব্যৱসায়ীসকল লোকচানৰ সন্মুখীন হ'বলগাত পৰে ৷ আনহাতে, এখন ডাম্পাৰে ২৪ চিএম শিল বা বালি আনিও ১০ চিএমৰ কৰ দিব লাগে ৷ তাৰফলত চৰকাৰৰ বহু পৰিমাণে কৰ লোকচান হয় ।

কিন্তু তালাচী চকীসমূহত থকা বিষয়া-কৰ্মচাৰী, পুলিচ আৰু বন বিভাগৰ কিছুসংখ্যক ব্যক্তি লাভৱান্বিত হয় । একেদৰে কেতিয়াবা ১২ চিএম সামগ্ৰী কঢ়িয়াই অনা এখন গাড়ীক ১০ চি এম চালান দিযাৰ বাবে তালাচী চকীসমূহত জৰিমনা বিহা হয় ৷

যাৰফলত লোকচানৰ সন্মুখীন হয় গাড়ীৰ মালিকসকল । বন বিভাগৰ এই নিয়ম অতি সোনকালে উঠাই লৈ বাহনৰ ক্ষমতা অনুযায়ী চালান দিয়াৰ ব্যৱস্থা কৰিব লাগে বুলি সংবাদমেলযোগে বনমন্ত্ৰী পৰিমল শুক্লবৈদ্যক অনুৰোধ জনায় ।

ইয়াৰ বাবে ১৫ দিনৰ সময় সীমা বান্ধি দিয়ে সংগঠনকেইটাই । যদি তেওঁলোকৰ অনুৰোধৰ প্ৰতি বন বিভাগে গুৰুত্ব নিদিয়ে তেতিয়াহ'লে অনাগত দিনত সকলো গাড়ীৰ মালিক একেলগ হৈ বন বিভাগৰ বিৰুদ্ধে আন্দোলন কৰিব বুলিও সংবাদমেলযোগে হুংকাৰ দিয়ে ৷