হিমন্তৰ সমষ্টি জালুকবাৰীত হেমন্তৰ হৈ নিৰ্বাচনী প্ৰচাৰ ৰাইজৰ দলৰ মুখপাত্ৰ জ্ঞানশ্ৰী বৰাৰ

#মৃণাল ডেকা,শুৱালকুছি,৩ এপ্ৰিল :

তৃতীয় তথা অন্তিম পৰ্যায়ৰ নিৰ্বাচনৰ বাবে মাজত মাথো দুটা দিন বাকী ৷ ৬ এপ্ৰিলত ভোটগ্ৰহণ  অনুষ্ঠিত হ'বলগীয়া ৰাজ্যৰ ভিতৰতে অন্যতম চৰ্চিত সমষ্টি হৈছে জালুকবাৰী সমষ্টি ৷ জালুকবাৰী সমষ্টিত ক্ৰমাৎ আকৰ্ষণীয় হৈছে নিৰ্বাচনী প্ৰচাৰ  অভিযান ৷ মন্ত্ৰী ড: হিমন্ত বিশ্ব শৰ্মাৰ দুৰ্গ হিচাপে চিহ্নিত জালুকবাৰী সমষ্টিৰ বিজেপিৰ চ’ৰাঘৰতে অখিল গগৈৰ নেতৃত্বত নতুনকৈ গঠিত আঞ্চলিক দল ৰাইজৰ দলৰ প্ৰাৰ্থী হেমন্ত সূতৰ ধাৰাবাহিক নিৰ্বাচনী প্ৰচাৰ ৷ নিৰ্বাচনী প্ৰচাৰত ৰাইজৰ দলৰ হৈ অংশ ল'লে মুখপাত্ৰ জ্ঞানশ্ৰী বৰাই ৷

 আমিনগাঁৱৰ ৰাইজৰ দলৰ মুখ্য কাৰ্য্যালয়ৰ পৰা বাইক ৰেলী কৰি আহি শুৱালকুছি বজাৰ চ’কত অনুষ্ঠিত এখন পথসভাত অংশগ্ৰহণ কৰি  মন্ত্ৰী হিমন্ত বিশ্ব শৰ্মাক তীব্ৰ সমালোচনা কৰি কয় যে এইখন চৰকাৰৰ দিনতে মূল্যবৃদ্ধি, ছিণ্ডিকেটৰাজ , টোলগেটৰ লগতে শুৱালকুছিৰ বস্ত্ৰ শিল্পকো ধ্বংস কৰা হৈছে ৷ আনহাতে,নাগপুৰৰ নিৰ্দেশত অসমত জয় আই অসমৰ পৰিৱৰ্তে এতিয়া অসমত চলাইছে ভাৰত মাতা কী জয়ৰ শ্লোগান।এই শ্লোগানে এদিন অসমতে অসমীয়াৰ অস্তিত্ব নাইকিয়া কৰিব বুলিও মত প্ৰকাশ কৰাৰ লগতে ৰাজ্যত এইবাৰ এখন জাতীয়তাবাদী চৰকাৰ হ'ব আৰু এই চৰকাৰৰ বাবে ৰাইজৰ দলৰ মনোনীত আৰু অসম জাতীয় পৰিষদৰ সমৰ্থিত প্ৰাৰ্থী হেমন্ত সূতক ভোট দিয়াৰ বাবেও আহ্বান জনায় ৰাইজৰ দলৰ নেত্ৰী জ্ঞানশ্ৰী বৰাই।

নিৰ্বাচনী প্ৰচাৰ অভিযানত ৰাইজ দলৰ প্ৰাৰ্থী হেমন্ত সূতে মন্ত্ৰী হিমন্তৰ অপশাসনৰ অন্ত পেলাই জালুকবাৰী সমষ্টিবাসীক এইবাৰ এখন কংগ্ৰেছ আৰু বিজেপিৰ বিৰোধী চৰকাৰ গঠনৰ বাবে ভোট দিবলৈ আহ্বান জনায়।