মন্ত্ৰী হিমন্তৰ দুৰ্গত অভিনেতা যতীন বৰাৰ নিৰ্বাচনী প্ৰচাৰ:শুৱালকুছিত অংশগ্ৰহণ কৰিলে পদযাত্ৰাত

*হিমন্ত বিশ্ব শৰ্মা অসমৰ আটাইতকৈ ডাঙৰ চেলিব্ৰিটী:যতীন বৰা*

*গন্ধমৌ পঞ্চায়তত নিৰ্বাচনী পদযাত্ৰাত ৰিণিকি ভূঞা শৰ্মাৰ অংশগ্ৰহণ*

#মৃণাল ডেকা,শুৱালকুছি,৩ এপ্ৰিল:

ৰাজ্যত ইতিমধ্যে প্ৰথম আৰু দ্বিতীয়  পৰ্যায়ৰ নিৰ্বাচন শেষ হোৱাৰ পিচতে এতিয়া তুংগত উঠিছে তৃতীয় তথা অন্তিম পৰ্যায় নিৰ্বাচনৰ বাবে প্ৰচাৰ অভিযান ৷

তৃতীয় পৰ্যায়ৰ  নিৰ্বাচন অনুষ্ঠিত হ'বলগীয়া সমষ্টিসমূহৰ ভিতৰত অন্যতম সমষ্টি হৈছে ৰাজ্যৰ প্ৰভাৱশালী মন্ত্ৰী ড: হিমন্ত বিশ্ব শৰ্মাৰ দুৰ্গ হিচাপে চিহ্নিত জালুকবাৰী সমষ্টি।জালুকবাৰী সমষ্টিৰ বস্ত্ৰনগৰী শুৱালকুছিত বিজেপি মিত্ৰজোঁটৰ প্ৰাৰ্থী ড° হিমন্ত বিশ্ব শৰ্মাৰ সমৰ্থনত বিজেপিৰ কৰ্মীসকলে উলিওৱা বিশাল নিৰ্বাচনী প্ৰচাৰৰ পদযাত্ৰাত অংশগ্ৰহণ কৰে অভিনেতা যতীন বৰাই ৷ পদযাত্ৰাত অংশগ্ৰহণ কৰি অভিনেতা যতীন বৰাই কয় যে হিমন্ত বিশ্ব শৰ্মা অসমৰ আটাইতকৈ ডাঙৰ চেলিব্ৰিটী ৷ তেওঁৰ সমষ্টিত আহি নিৰ্বাচনী পদযাত্ৰাত অংশগ্ৰহণ কৰিবলৈ পাই নিজকে ধন্য হোৱা বুলিও মন্তব্য কৰে ৷ আনহাতে,তেওঁ দ্বিতীয় পৰ্যায়ৰ নিৰ্বাচনত বিজেপিয়ে আশা কৰা ধৰণেৰে ভাল ফলাফল লাভ কৰিবলৈ সক্ষম হ'ব আৰু ৰাজ্যত পুনৰ বিজেপিৰ চৰকাৰ হ'ব বুলিও মন্তব্য কৰে ৷

আনহাতে,নিৰ্বাচনৰ দিন ঘোষণা হোৱাৰ পিছৰ পৰাই এদিনলৈকে সমষ্টিত উপস্থিত হোৱা নাই মন্ত্ৰী হিমন্ত বিশ্ব শৰ্মা ৷ মন্ত্ৰীগৰাকীয়ে নিজ সমষ্টিত সময় দিব পৰা নাই যদিও পত্নী ৰিণিকি ভূঞা শৰ্মাই ধাৰাবাহিক নিৰ্বাচনী প্ৰচাৰ চলাই আহিছে ৷ আজিও ১১৪ নং  গন্ধমৌ গাওঁ পঞ্চায়তৰ নিৰ্বাচনী সমিতিৰ উদ্যোগত উলিওৱা বৃহৎ নিৰ্বাচনী পদযাত্ৰাত পত্নী ৰিণিকি ভূঞা শৰ্মাই অংশগ্ৰহণ কৰি বিজেপি দলৰ প্ৰাৰ্থী হিমন্ত বিশ্ব শৰ্মাৰ হৈ নিৰ্বাচনী প্ৰচাৰ চলোৱাৰ লগতে ৰাইজক উৎসাহ যোগায় ৷ গন্ধমৌ পঞ্চায়তৰ পানী অফিচ চ’কৰ পৰা প্ৰায় তিনি সহস্ৰাধিক বিজেপি কাৰ্যকৰ্তাই অংশগ্ৰহণ কৰা পদযাত্ৰা ৰাৱনবৈ অঞ্চলত অন্ত পৰে ৷

এই  পদযাত্ৰাত অংশগ্ৰহণ কৰি গন্ধমৌ পঞ্চায়তৰ সভাপতি ইজাজুৰ ৰহমানে (মুকুট) কয় যে এইবেলি জালুকবাৰী সমষ্টিবাসী ৰাইজে আমাৰ মৰমৰ নেতা তথা হিমন্ত বিশ্ব শৰ্মাক অভিলেখসংখ্যক ভোটত বিজয়ী কৰাব আৰু আজিৰ পদযাত্ৰাত ৰাইজৰ স্বতঃস্ফূৰ্ত অংশগ্ৰহণে তাকেই প্ৰমাণ কৰে।