ঘগ্ৰাপাৰৰ ৯খন গাঁও পঞ্চায়তত বিজেপিৰ পদযাত্ৰা

#দ্বিজেন ডেকা,ঘগ্ৰাপাৰ,৩০ মাৰ্চঃ

দ্বিতীয় পৰ্যায়ত অনুষ্ঠিত হ'বলগীয়া বিধানসভা নিৰ্বাচনৰ আজি প্ৰচাৰৰ অন্তিম দিনা নলবাৰীৰ মিত্ৰজোঁটৰ প্ৰাৰ্থী জয়ন্তমল্ল বৰুৱাৰ সমৰ্থনত বিজেপিয়ে সমষ্টিটোৰ ঘগ্ৰাপাৰ অঞ্চলৰ ৯খন গাঁও পঞ্চায়তত পৃথকে পৃথকে সমদল উলিয়াই পদযাত্ৰাৰে শক্তি প্ৰদৰ্শন কৰে।বড়িগোগ বনভাগ মণ্ডল বিজেপিৰ অন্তৰ্গত দেহাৰকুছি,দতৰা,ঘগ্ৰাপাৰ, পূব-বনভাগ, খাতিকুছি,আল্লিয়া,দিহজাৰী,চটাইবাৰী আৰু বালিতাৰা পঞ্চায়তত আজি প্ৰতিখন গাঁৱৰে দলীয় কৰ্মীসকলে জয়ন্তমল্ল বৰুৱাৰ সমৰ্থনত পদযাত্ৰা কৰে।একোখন পঞ্চায়তত প্ৰায় ডেৰ সহস্ৰাধিক দলীয় কৰ্মীয়ে অংশগ্ৰহণ কৰি চমক সৃষ্টি কৰে।

ইফালে,ঘগ্ৰাপাৰ পঞ্চায়তত উলিওৱা সমদলটোৰ সামৰণি ভাষণ প্ৰদান কৰে জিলা পৰিষদৰ সদস্য পংকজ ডেকাই।ভাষণত প্ৰসংগত ডেকাই নলবাৰীত মিত্ৰজোঁটৰ প্ৰাৰ্থী জয়ন্তমল্ল বৰুৱাই এইবাৰ ১ লাখ ৩০ হেজাৰ ভোট লাভ কৰি বিজয়ী হোৱাটো নিশ্চিত বুলি দাবী কৰে।ডেকাই নিজৰ ভাষণত কংগ্ৰেছ আৰু এ আই ইউ ডি এফক তীব্ৰ ভাষাৰে আক্ৰমণ কৰি কংগ্ৰেছ দুৰ্নীতি-ভ্ৰষ্টাচাৰ লগত লৈ ফুৰা দল বুলি কটাক্ষ কৰে।

ঘগ্ৰাপাৰ হৰিমন্দিৰত সামৰণি পৰা পদয়াত্ৰাটোত ঘগ্ৰাপাৰ গাঁও পঞ্চায়তৰ সভাপতি ৰাতুল শৰ্মা,আঞ্চলিক পঞ্চায়তৰ সদস্য মনেশ্বৰ ভৰালী,উপ-সভানেত্ৰী বিনীতা মজুমদাৰ আদিয়ে অংশগ্ৰহণ কৰে।আনহাতে,নাৰপাৰা চ'কৰ মিত্ৰজোঁটৰ বিজেপিৰ কাৰ্যলয়ৰ পৰা উলিওৱা পদযাত্ৰাৰ নেতৃত্ব দিয়ে পঞ্চায়ত প্ৰভাৰী শ‍্যামন্ত শৰ্মাই।ইয়াৰ পিছত পদযাত্ৰাটোয়ে সমগ্র পঞ্চায়তখন পৰিভ্ৰমণ কৰে।