'মা তোমাৰ অহাৰ পৰিল দিন' উন্মোচন

ক্ৰমাগতভাৱে ধৰ্মীয় অনুষ্ঠানসমূহে সামাজিক পৰম্পৰা হেৰুওৱাৰ সময়তে এক ব‍্যতিক্ৰমী পদক্ষেপ চকুত পৰিল কলিয়াবৰত । দুৰ্গা পূজাৰ ধৰ্মীয় অনুভূতিৰে এটি গীত ৰচনা আৰু পৰিচালনা কৰি দুৰ্গা পূজাৰ প্ৰাক্‌ক্ষণত ৰাইজলৈ আগবঢ়াইছে কেইগৰাকীমান কম বয়সীয়া ছাত্ৰ-ছাত্ৰীয়ে ।

জখলাবন্ধা ছেইণ্ট ৰবাৰ্ট স্কুলৰ  দশম শ্ৰেণীৰ ছাত্ৰ পঞ্চম ভৌমিকে ৰচনা আৰু পৰিচালনা কৰি উলিয়ালে দুৰ্গা পূজা বিষয়ক এই গীতটি । অসমীয়া আৰু বঙালী উভয় ভাষাতে ৰচনা কৰা গীত দুটিত কণ্ঠদান কৰিলে অষ্টম, নৱম আৰু দশম শ্ৰেণীৰ ছাত্ৰী ক্ৰমে হিতাশ্ৰী দাস, দিশা ৰয় আৰু স্নেহা মুখাৰ্জীয়ে ।

গুৱাহাটীত ইতিমধ‍্যে বাণীবন্ধন জগতত থিতাপি লোৱা উদীয়মান যুৱক কঙ্কনজ‍্যোতি হাজৰিকাই কলিয়াবৰৰ ঘৰতেই সীমিত সা-সুবিধাৰে গীত দুটি বাণীবন্ধন কৰিছিল । পি বি মিউজিকৰ ব‍্যৱস্থাপনাত বাণীবন্ধনৰ লগতে দৃশ‍্যাংশ সংযোজন কৰি ইতিমধ‍্যে ইউ টিউবত উপভোগ কৰিবলৈ সুবিধা কৰা হৈছে ।

অসমীয়া গীতটিৰ শীৰ্ষক "মা তোমাৰ অহাৰ পৰিল দিন" আৰু বঙালী গীতটিৰ শীৰ্ষক "মা তোমাৰ আসাৰ হ'ল দিন" । "মা তোমাৰ অহাৰ পৰিল দিন" শীৰ্ষক অসমীয়া গীতটিৰ বাংলা অনুবাদ কৰিছে ৰূপজ‍্যোতি গোস্বামীয়ে ।

অসমীয়া গীতটিত কণ্ঠ নিগৰাইছে স্নেহা মুখাৰ্জী আৰু দিশা ৰয়ে । বাংলা গীতটি গাইছে হিতাশ্ৰী দাসে আৰু সহযোগিতা কৰিছে স্নেহা মুখাৰ্জী, দিশা ৰয় আৰু মল্লিকা মুখাৰ্জীয়ে ।

জখলাবন্ধাৰ প্ৰসিদ্ধ স্বৰ্ণ অলঙ্কাৰ শিল্পী আৰু ব‍্যৱসায়ী ৰমদাকান্ত ভৌমিকৰ নাতি পঞ্চমৰ পিতৃ-মাতৃ কলিয়াবৰ জখলাবন্ধাৰ সাংস্কৃতিবান ব‍্যক্তি প্ৰশান্ত ভৌমিক আৰু যমুনা নেৱাৰ ভৌমিক দুয়ো এসময়ৰ সঙ্গীত শিল্পী ।

পঞ্চমেও ইতিমধ‍্যে তবলাত স্নাতক সন্মান লাভ কৰিছে । ইতিমধ‍্যে কলিয়াবৰ অঞ্চলত সঙ্গীতৰ জগতত কিশোৰ মনৰ চিন্তাই যথেষ্ট সমাদৰ লাভ কৰিছে ।