বৰিহাটৰ নৱজীৱন কেন্দ্ৰত বিশেষ অনুষ্ঠান

নুৰুল ইছলাম,চানডুবি:

সমগ্ৰ দেশজুৰি পৱিত্ৰ বৰদিন পালনৰ সমান্তৰালকৈ কামৰূপ জিলাৰ বৰিহাটতো এটা বিশেষ অনুপ্ৰেৰণামূলক অনুষ্ঠানৰ আয়োজন কৰা হয় ৷ স্বেচ্ছাসেৱী সংস্থা " অসম চেন্টাৰ ফ’ৰ ৰুৰেল ডেভেলপমেণ্ট"ৰ অধীনৰ বৰিহাটত অৱস্থিত নৱজীৱন পুনৰ সংস্থাপন কেন্দ্ৰত অনুষ্টুপীয়াকৈ আয়োজিত অনুষ্ঠানটিত গুৱাহাটী উচ্চ ন্যায়ালয়ৰ অধিবক্তা তথা জনপ্ৰিয় সাংবাদিক দীপক শৰ্মা উপস্থিত থাকি মানৱ জীৱনত সকলো ধৰণৰ প্ৰতিবন্ধকতা তথা বাধা-বিঘিনি নেওচি কেনেদৰে জীৱনমুখী যাত্ৰা আগুৱাই নিয়া সম্পৰ্কে আৰু সফলতা অৰ্জনৰ সংকল্পবোৰৰ বিষয়ে আলোকপাত কৰে ৷ তদুপৰি কেন্দ্ৰটোৰ আৱাসীসকলৰ উপৰি বিদ্যুৎ কলিতা , মনোজ ভৰালী তথা স্বেচ্ছাসেৱী সংস্থাটোৰ সভাপতি নৱজ্যোতি শৰ্মা,বিদ্যুৎ কলিতাকে ধৰি কেইবাগৰাকীও বিশিষ্ট ব্যক্তি উপস্থিত আছিল।ইফালে,ভনীমা ডাকুৱাই আঁত ধৰা অনুষ্ঠানটিত পুনৰ সংস্থাপন কেন্দ্ৰটোৰ আৱাসীসকলে গীত,নৃত্যৰ উপৰি নিজ নিজ প্ৰতিভাসমূহ প্ৰদৰ্শন কৰি সকলোকে আকৰ্ষিত কৰে।অনুষ্ঠানটিৰ শেষত এচিআৰডি’ৰ সম্পাদিকা ৰেৱতী শৰ্মাই সকলোকে শলাগৰ শৰাই আগবঢ়ায়।