আমনিত তিনিখন গৰু-ম'হভৰ্তি ট্ৰাক জব্দ

নগাঁও জিলাৰ চামগুৰিৰ আমনিত যোৱানিশা জব্দ হয় তিনিখনকৈ গৰু-ম'হ ভৰ্তি ট্ৰাক। উজনি অসমৰ পৰা নগাঁও অভিমুখে ৩৭নং ৰাষ্ট্ৰীয় ঘাইপথেৰে আহি থকা অৱস্থাত চামগুৰি আৰক্ষীয়ে থানাৰ সন্মুখত বেৰিকেড লগাই বাহন কেইখন জব্দ কৰাৰ চেষ্টা চলায়। আৰক্ষীৰ উক্ত অভিযানৰ বিষয়ে আগতীয়া উমান পাই আমনিত AS-01LC-1816, AS-07AC-8059 আৰু AS-01LC-3346 নম্বৰৰ ট্ৰাক কেইখন এৰি চালক আৰু হেণ্ডিমেন কেইজনে পলায়ন কৰে। পিছত সমগ্ৰ ঘটনাৰ বিষয়ে জানিব পাৰি চামগুৰি আৰক্ষী ঘটনাস্থলীত উপস্থিত হৈ আমনিৰ পৰা নিশাই গৰু-ম'হ ভৰ্তি ট্ৰাক কেইখন জব্দ কৰিবলৈ সক্ষম হয়।

উল্লেখযোগ্য যে, তিনিখনকৈ ট্ৰাকত প্ৰায় অৰ্ধ-শতাধিক গৰু-ম'হ কোনোবা চক্ৰ এটাই অবৈধভাৱে কোনো অজ্ঞতা স্থানলৈ সৰবৰাহ কৰাৰ চেষ্টা চলাইছিল বুলি সন্দেহ প্ৰকাশ কৰিছে প্ৰত্যক্ষদৰ্শীয়ে।