কলিয়াবৰ কংগ্ৰেছৰ সাংবাদিকক সম্বৰ্দ্ধনা জ্ঞাপন আৰু মত বিনিময় অনুষ্ঠান

কলিয়াবৰৰ পৰা প্ৰদীপ লস্কৰ:

কলিয়াবৰত শনিবাৰে এটা ব্যতিক্ৰমী পৰিৱেশ দেখা পোৱা গ'ল।কলিয়াবৰত পোনপ্ৰথমবাৰৰ বাবে কলিয়াবৰীয়া সাংবাদিকসকলৰ সৈতে কলিয়াবৰৰ কংগ্ৰেছ কৰ্মীসকলৰ এটা
মত বিনিময় অনুষ্ঠান অনুষ্ঠিত হৈ যায়। কলিয়াবৰ আৰু পশ্চিম কলিয়াবৰ ব্লক কংগ্ৰেছ কমিটীৰ সৌজন্যত কলিয়াবৰ তিনিআলিৰ গৌৰী ভৱনত আয়োজিত অনুষ্ঠানটোৰ আঁঁত ধৰি অসম প্ৰদেশ যুৱ কংগ্ৰেছ কমিটীৰ সাধাৰণ সম্পাদক মেঘনাথ ছেত্ৰীয়ে কয় যে কলিয়াবৰৰ সামাজিক, ৰাজনৈতিক আৰু অৰ্থনৈতিক ক্ষেত্ৰৰ লগতে বিশ্বত ত্ৰাসৰ সৃষ্টিকাৰী ক'ভিড-১৯ মহামাৰীৰ সময়ছোৱাত ৰাইজৰ মাজত সজাগতা আৰু সচেতনতা বৃদ্ধি কৰি নিষ্ঠা আৰু দায়িত্বশীলতাৰে সাংবাদিকসকলে নিস্বাৰ্থ সেৱা আগবঢ়োৱা কাৰ্য সঁচাই প্ৰশংসনীয়।

কলিয়াবৰৰ জ্যেষ্ঠ সাংবাদিক নৃপেন চন্দ্ৰ কেওঁট, তৰুণ মুক্তিয়াৰ, গোলাপ শইকীয়া, প্ৰদীপ লস্কৰ,  অমূল্য বৰা, গৌতম বৰা, দিগন্ত মহন্ত, কিশোৰী কুমাৰ ডেকা, জয়ন্ত কুমাৰ শৰ্মা, ৰূপজ্যোতি গোস্বামীকে প্ৰমুখ্য কৰি সাংবাদিকসকলে কিছুমান বিষয়ত পৰ্যালোচনা আগবঢ়ায়।অনুষ্ঠানত কলিয়াবৰ ব্লক কংগ্ৰেছৰ প্ৰাক্তন সভাপতি প্ৰদীপ বৰুৱাই কয় যে কলিয়াবৰত কংগ্ৰেছ দলে অনাগত দিনত ঐক্যবদ্ধভাৱে কাম কৰি যাব।এনে কাম-কাজত ভুল-ক্ৰুটিবোৰ আঙুলিয়াই দিবৰ বাবে তেওঁ সাংবাদিকসকলক আহ্বান জনায় আৰু সকলোকে কৃতজ্ঞতা জ্ঞাপন কৰে।জ্যেষ্ঠ কংগ্ৰেছ নেতা অৱসৰপ্ৰাপ্ত অধ্যাপক প্ৰশান্ত কুমাৰ শইকীয়া, সুৰেন্দ্ৰ কুমাৰ বৰঠাকুৰ, বিন্দু গঞ্জু,জমছেৰ আলী, নাচৰিন চুলতানা,পিংকু বৰা, ইমৰান হুছেইন আৰু কলিয়াবৰৰ কংগ্ৰেছ দলৰ কৰ্মকৰ্তাসকল উপস্থিত থাকে।কলিয়াবৰ আৰু পশ্চিম কলিয়াবৰ ব্লক কংগ্ৰেছৰ সভাপতি যতীন বৰা আৰু শৈলেশ দাসে সাংবাদিকসকলৰ দিহা-পৰামৰ্শ কামনা কৰাৰ লগতে কৃতজ্ঞতা জ্ঞাপন কৰে।আৰম্ভণিতে সাংবাদিকসকলক একোখনি ফুলাম গামোচা আৰু প্ৰশংসা-পত্ৰৰে সম্বৰ্ধনা জনোৱা হয়।