বঙাইগাঁও জিলাৰ যোগীঘোপাত বন বিভাগৰ অভিযান:অবৈধ কাঠফলা কলসহ কাঠৰ কুণ্ডা জব্দ 

বঙাইগাঁৱৰ প্ৰতিবেদক:

বঙাইগাঁও জিলাৰ যোগীঘোপা থানাৰ অন্তৰ্গত ভাবিৰ টিলাত  শনিবাৰে বন বিভাগে গোপন সূত্ৰৰ পম এটা অভিযান চলায়।আই উপত্যকা বন সংমণ্ডল প্ৰাধিকাৰীৰ নিৰ্দেশত বঙাইগাওঁস্থিত বিশেষ বন সুৰক্ষা বাহিনীয়ে দলনি বিলৰ মাজত অৱস্থিত ভাবিৰটিলা নামৰ ঠাইত চলোৱা এই অভিযানত এটা অবৈধ কাঠফলা কল উৎখাত কৰাৰ লগতে কিছু পৰিমাণৰ অবৈধ কাঠৰ কুণ্ডা জব্দ কৰিবলৈ সক্ষম হয়।

পিছত উক্ত জব্দকৃত কাঠখিনিৰ লগতে কাঠফলা কলটো অভয়াপুৰী বনাঞ্চলিক কাৰ্যালয়লৈ অনা হয় । উল্লেখ্য যে চোৰাং কাঠ ব্যৱসায়ীয়ে বন বিভাগৰ চকুত ধুলি দি বিলৰ টিলাত উক্ত অবৈধ কাঠফলা কল স্থাপন কৰি অবৈধ কাঠৰ বেহা চলাই আহিছিল ৷