নগাঁৱত কৃতী ছাত্ৰ-ছাত্ৰীক সম্বৰ্ধনা কংগ্ৰেছ নেতা শান্তনু শৰ্মাৰ

নগাঁৱৰ পৰা ৱাহিদুদ জামান:

নগাঁৱৰ কংগ্ৰেছ দলৰ জ্যেষ্ঠ নেতা শান্তনু শৰ্মাই শনিবাৰে নগাঁও সদৰ সমষ্টিৰ অন্তৰ্গত অঞ্চলসমূহত সদ্য ঘোষিত হাইস্কুল শিক্ষান্ত পৰীক্ষা আৰু উচ্চতৰ মাধ্যমিকৰ চূড়ান্ত পৰীক্ষাত সুখ্যাতিৰে উত্তীৰ্ণ হোৱা ছাত্ৰ-ছাত্ৰীসকলক সম্বৰ্ধনা জনায়। কংগ্ৰেছ নেতাগৰাকীয়ে সদৰ সমষ্টিৰ  দক্ষিণপাট মণ্ডল কংগ্ৰেছৰ অন্তৰ্গত বৰকলা, দক্ষিণপাট,বৰজহা,মহগৰীয়া আদি অঞ্চলৰ প্ৰায় শতাধিক কৃতী ছাত্ৰ-ছাত্ৰীক ঘৰে ঘৰে গৈ সম্বৰ্ধনা জনায়।তেওঁ শুকুৰবাৰেও খাগৰিজান ব্লক আৰু মণ্ডল কংগ্ৰেছৰ অন্তৰ্গত লাওগাঁঁও, বেলতলী,ৰৌমাৰী আৰু ইটাপাৰা অঞ্চলৰ শতাধিক ছাত্ৰ-ছাত্ৰীক সম্বৰ্ধনা জনায়।জ্যেষ্ঠ নেতাগৰাকীয়ে সংবাদ মাধ্যমৰ সৈতে হোৱা বাৰ্তালাপত কয় যে শিকা অবিহনে এখন দেশ বা সমাজ আগবাঢ়ি যাবলৈ নোৱাৰে।শিক্ষিত সমাজক কুসংস্কাৰ,অন্ধবিশ্বাস আদিয়ে গ্ৰাস কৰিবলৈ নোৱাৰে।সেয়ে শিক্ষাক আমি অধিক গুৰুত্ব দিয়া উচিত।তেওঁ কৃতী ছাত্ৰ-ছাত্ৰী সকলৰ উজ্জ্বল ভৱিষ্যত কামনা কৰাৰ লগতে একাগ্ৰতাৰে নিজৰ শিক্ষা জীৱন অতিবাহিত কৰিবলৈ আহ্বান জনায়।

ৱাহিদুদ জামান (নগাঁও)