বঙাইগাঁৱত যুৱকৰ সলিল সমাধি:এছডিআৰএফৰ সহযোগত মৃতদেহ উদ্ধাৰ

বঙাইগাঁৱৰ প্ৰতিবেদক:

বঙাইগাঁও সদৰ থানাৰ অন্তৰ্গত চাপৰাকাটাত বুধবাৰে সংঘটিত হয় এক মৰ্মান্তিক ঘটনা।পুখুৰীত গা ধুবলৈ গৈ অকাল মৃত্যুক সাৱটি লয় ২৫ বছৰীয়া দ্বীপেন ৰাভাই।জানিব পৰা মতে বুধবাৰে দুপৰীয়াৰ ভাগত গৰু চৰাবলৈ ঘৰৰ পৰা ওলাই গৈছিল দ্বীপেন ৰাভা।তাৰ পিছতে বিয়লিলৈ লগৰীয়াৰ সৈতে চাপৰাকাটা পাহাৰৰ ফায়াৰিং ৰেঞ্জৰ ওচৰৰ পুখুৰীত গা ধুবলৈ যায়।কিন্তু গা ধুই থাকোতেই যুৱকজন গভীৰ পানীত সোমাই পৰাত মৃত্যুমুখত পৰে।ঘটনাটো সংঘটিত হোৱাৰ পিছতেই স্থানীয় ৰাইজে বহুসময়লৈ যুৱকজনক বিচাৰিবলৈ চেষ্টা চলাই যদিও যুৱকজনৰ কোনো সন্ধান উলিয়াবলৈ সক্ষম নহ'ল।পিছত এছডিআৰএফৰ সহযোগতহে সন্ধিয়াৰ ভাগত যুৱকজনৰ মৃতদেহ উদ্ধাৰ কৰিবলৈ সক্ষম হয়।আনহাতে,উদ্ধাৰ হোৱাৰ পিছতেই আৰক্ষীয়ে মৃতদেহটো মৰণোত্তৰ পৰীক্ষাৰ বাবে বঙাইগাঁও অসামৰিক চিকিৎসালয়লৈ প্ৰেৰণ কৰে।