নাগৰিকত্ব সংশোধনী বিধেয়কৰ বিৰুদ্ধে লংকা তিনিআলিত জোঁৰ সমদল

লংকাৰ পৰা মনোজ কুমাৰ পাঠক

জাতিধ্বংসী নাগৰিকত্ব সংশোধনী বিধেয়ক, ২০১৬ৰ তীব্ৰ বিৰোধিতাৰে ৰাজ্যজুৰি নিৰৱচ্ছিন্নভাৱে অব্যাহত আছে উত্তাল প্ৰতিবাদ| বিধেয়ক বাতিলৰ দাবীত ক'ৰবাত যদি ৰাজপথ অৱৰোধেৰে সাব্যস্ত কৰিছে প্ৰতিবাদ, আন ক'ৰবাত আকৌ জোঁৰ সমদল উলিয়াই ৰাজপথলৈ ওলাই আহিছে সকলো৷

ৰাজ্যৰ অন্যান্য ঠাইৰ লগতে দেওবাৰে নাগৰিকত্ব সংশোধনী বিধেয়কৰ তীব্ৰ বিৰোধিতাৰে লংকাৰ তিনিআলিত হাতে হাতে জোঁৰ লৈ প্ৰতিবাদ সাব্যস্ত কৰে বিভিন্ন দল-সংগঠনে| উদালি তিনিআলি সচেতন নাগৰিক মঞ্চ, আছু, কৃষক মুক্তি সংগ্ৰাম সমিতি, লংকা নাগৰিক সমাজকে ধৰি বিভিন্ন দল-সংগঠনৰ প্ৰায় ৩ শতাধিক লোকে লংকা তিনিআলিৰ পৰা ৫৪নং ৰাষ্ট্ৰীয় ঘাইপথেৰে জোঁৰ সমদল উলিওৱা হয়৷

প্ৰতিবাদকাৰীসকলে অসম চৰকাৰ হায় হায়, বিজেপি মুৰ্দাবাদ, নাগৰিকত্ব সংশোধনী বিধেয়ক বাতিল কৰক আদি বিভিন্ন প্ৰতিবাদী শ্লোগানৰে ৰাজপথ উত্তাল কৰি তোলে৷

লগতে এই বিধেয়কখন শীঘ্ৰে বাতিল নকৰিলে অনাগত দিনত ইয়াতকৈও অধিক জংগী আন্দোলন গঢ়ি তোলাৰ হুংকাৰ প্ৰদান কৰে প্ৰতিবাদকাৰীসকলে৷