চিৰাং জিলা প্ৰেছ ক্লাবৰ অধিৱেশন সম্পন্ন : নতুন সমিতি গঠন

চিৰাং জিলাৰ কাকাৰাগাঁৱৰ ভুমীশ্বৰ পাহাৰৰ নামনিৰ নৈসৰ্গিক প্ৰাকৃতিক পৰিৱেশৰ মাজত দেওবাৰে চিৰাং জিলা প্ৰেছ ক্লাবৰ ষষ্ঠ দ্বি-বাৰ্ষিক অধিবেশনখনি এদিনীয়া কাৰ্যসূচীৰে অনুষ্ঠিত হয়। পুৱা জিলা প্ৰেছ ক্লাবৰ সভাপতি বিপুল কুমাৰ দাসে পতাকা উত্তোলনেৰে কাৰ্যসূচীৰ শুভাৰম্ভ কৰে৷

স্মৃতি তৰ্পণ কাৰ্যসূচী মুকলি কৰে উপ-সভাপতি ভৃগুমণি ৰায়ে৷ পাছলৈ জিলাখনৰ সংবাদকৰ্মীৰ উপস্থিতিৰে  বিপুল কুমাৰ দাসৰ সভাপতিত্বত সাধাৰণ সভা অনুষ্ঠিত হয়। চিৰাং জিলা প্ৰেছ ক্লাবৰ সাধাৰণ সম্পাদক আবুবক্কৰ ছিদ্দিকে বিগত কাৰ্যকালৰ প্ৰতিবেদন পাঠ কৰাৰ পাছতে কে'বাটাও প্ৰস্তাৱ গ্ৰহণ কৰে৷

এই সাধাৰণ সভাৰ জৰিয়তে পুৰণি সমিতিখন ভংগ কৰি জ্যেষ্ঠ সাংবাদিক অমৃত নাৰায়ণ পাটগিৰিক সভাপতি আৰু জয়ন্ত দেৱনাথক সাধাৰণ সম্পাদক হিচাপে নিৰ্বাচিত কৰি তেৰজনীয়া নতুন কাৰ্যনিৰ্বাহক সমিতিখন গঠন কৰা হয়। সভাই আবুবক্কৰ ছিদ্দিক আৰু হীৰকজ্যোতি মেধিক উপ-সভাপতি, সঞ্জয় কুমাৰ সৰকাৰ আৰু বিপুল কুমাৰ নাথক সহকাৰী সম্পাদক, হেমন্ত ৰায় আৰু দুৰ্লভ তালুকদাৰক সাংগঠনিক সম্পাদক, হেমেন শৰ্মাক সাহিত্য আৰু সাংস্কৃতিক সম্পাদক আৰু ভৃগুমণি ৰায়, ধৰ্মেন্দ্ৰ ৰায়, ছবিলাল নিৰোলা আৰু বিপুল কুমাৰ দে'ক কাৰ্যকৰী সদস্য হিচাপে নিৰ্বাচিত কৰে। উক্ত সভাতে বিদায়ী সভাপতি বিপুল কুমাৰ দাস আৰু জ্যেষ্ঠ সাংবাদিক কুঞ্জমোহন ৰায়ক উপদেষ্টা হিচাপে মনোনীত কৰা হয়।