মৰিগাঁৱত কিশোৰী বলাৎকাৰৰ অপচেষ্টা, থানাত গোচৰ ৰুজু

মৰিগাঁৱৰ পৰা জিতুমনি নাথ
মৰিগাঁৱত কিশোৰী বলাৎকাৰৰ এক ভয়ংকৰ ঘটনাক লৈ  সৃষ্টি হৈছে তীব্ৰ প্ৰতিক্ৰিয়া । ঘৰত কোনো নথকাৰ সুযোগ গ্ৰহণ কৰি এই ভয়ংকৰ ঘটনাটো সংঘটিত হৈছে মৰিগাঁও নগৰৰ সমীপৰ ১নং মৰাকলঙ গাঁৱত । কিশোৰীগৰাকীক বলাৎকাৰৰ অপচেষ্টা চলোৱা যুৱকজন একে গাৱঁৰে জয়ন্ত চৌহান বুলি জানিব পৰা গৈছে ৷

উল্লেখযোগ্য যে কিশোৰীগৰাকীৰ পিতৃ-মাতৃয়ে কালি অনুষ্ঠিত পঞ্চায়ত নিৰ্বাচনৰ ভোটদানৰ বাবে যোৱাত অকলশৰীয়া কিশোৰীগৰাকীক বিড়ি বিচৰাৰ চলেৰে লম্পট যুৱকজনে বলাৎকাৰৰ অপচেষ্টা চলায় ৷ কিশোৰীগৰাকীয়ে বাধা প্ৰদান কৰাত পাষণ্ড যুৱকজনে কাঁচিৰে ৰেপি কিশোৰীগৰাকীৰ ডিঙি আৰু হাতত গুৰুতৰভাৱে আঘাট কৰে ৷

তাৰোপৰি মুখত আঘাট কৰি দাঁত পৰ্যন্ত সৰুৱাই পেলাই ৷ উপায়ন্তৰ হৈ কিশোৰীগৰাকীয়ে চিঞৰ-বাখৰ কৰাত ওচৰৰ লোক ওলাই আহে আৰু এনে অৱস্থাত লম্পট যুৱকজন পলাই যোৱাত কথমপি প্ৰাণ ৰক্ষা পৰে কিশোৰীগৰাকী ৷ সমগ্ৰ ঘটনা সন্দৰ্ভতত কালি নিশা মৰিগাঁও থানাত কিশোৰীগৰাকীৰ মাতৃয়ে এক এজাহাৰ দাখিল কৰাত আৰক্ষীয়ে ৬৪৩/১৮ নং গোচৰ ৰুজু কৰি লম্পট যুৱকজনক  বিচাৰি আৰক্ষীয়ে অভিযান চলাই আছে বুলি জানিব পৰা গৈছে যদিও পলাতক অৱস্থাত থকা জয়ন্ত চৌহান নামৰ লম্পটটোক বৰ্তমানলৈ কৰায়ত্ত কৰিবলৈ সক্ষম হোৱা নাই মৰিগাঁও আৰক্ষী ৷