ৰাজ্যৰ বিভিন্ন প্ৰান্তত অসম বন্ধৰ মিশ্ৰিত প্ৰভাৱ : বৰপেটাৰোডত বিবাহযাত্ৰীৰ বাছলৈ শিলগুটি নিক্ষেপ

বঙালী যুৱ ছাত্ৰ ফেডাৰেচনে আজি পুৱাৰে পৰা জনোৱা ২৪ ঘণ্টীয়া অসম বন্ধৰ ৰাজ্যত মিশ্ৰিত প্ৰভাৱ পৰা দেখা গৈছে ৷

উল্লেখ্য  যেবৃহস্পতিবাৰে অচিনাক্ত আততায়ীয়ে ৫জনকৈ নিৰীহ লোকক গুলীয়াই হত্যা কৰাৰ প্ৰতিবাদত সংগঠনটোৱে এই বন্ধৰ আহ্বান জনাইছিল ৷

নাৰায়ণপুৰত নপৰিল বন্ধৰ কোনো প্ৰভাৱ

বন্ধৰ মাজতে নাৰায়ণপুৰত অব্যাহত আছে সাধাৰণ জন-জীৱন ৷ বঙালী যুৱ ছাত্ৰ পৰিষদে আহ্বান জনোৱা অসম বন্ধৰ প্ৰভাৱ শূন্য নাৰায়ণপুৰত ৷ যান-বাহনৰ চলাচলৰ লগতে খোলা আছে ব্যৱসায়িক প্ৰতিষ্ঠানসমূহ ৷

বিশ্বনাথত আংশিক প্ৰভাৱ

অসম বন্ধৰ প্ৰভাৱ বিশ্বনাথত আংশিকভাৱে পৰা দেখা গৈছে । সকলো ধৰণৰ যান-বাহন চলাচল কৰি আছে । ব্যৱসায়িক প্ৰতিষ্ঠান  বন্ধ যদিও একাংশ দোকান খোলা আছে । দৈনিক বজাৰ বন্ধ যদিও অস্হায়ীভাৱে বিশ্বনাথ ঘাট পথত বহিছে বজাৰ ।

বৰপেটাৰোডত বিবাহযাত্ৰীৰ গাড়ীলৈ শিলগুটি নিক্ষেপ

বৰপেটাৰোডত সৰ্বাত্মক বন্ধৰ প্ৰভাৱ পৰা পৰিলক্ষিত হয় ৷ পাতলকৈ দুই-এখন গাড়ী চলি থকাৰ বাহিৰে ৰাজপথ প্ৰায় শূন্য ৷ কলভাঙ্গাত 
৩১নং ৰাষ্ট্ৰীয় ঘাইপথেৰে বিবাহযাত্ৰী কঢ়িয়াইলৈ গৈ থকা বাছত শিল দলিয়ালে বন্ধ সমৰ্থকে ।

বাছখনৰ গ্লাছ ভাঙি চুচূৰ্মৈ কৰি দিয়ে বন্ধ সমৰ্থকে । বাছখনত কলগছৰ পুলি বান্ধি সৰভোগৰ চুলিয়াকাটাৰ পৰা শিৱসাগৰ অভিমুখে বিবাহযাত্ৰী কঢ়িয়াই লৈ গৈ আছিল ৷ থানাত আশ্ৰয় দৰাসহ বিবাহযাত্ৰীৰ ৷

চাপৰত বন্ধ সৰ্বাত্মক

বঙালী যুৱ ছাত্ৰ ফেডাৰেচনৰ আহ্বানত ২৪ ঘণ্টীয়া বন্ধৰ প্রতি সঁহাৰি জনাই ধুবুৰী জিলাৰ চাপৰ অঞ্চলত সৰ্বাত্মক বন্ধ পালন কৰে । পুৱা মৌৱাটাৰী চাৰিআলিত বঙালী সম্প্রদায়ৰ শ শ যুৱকে ৩১নং ৰাষ্ট্রীয় ঘাইপথ অৱৰোধ কৰে আৰু টায়াৰ জ্বলাই বিভিন্ন শ্লোগানেৰে উত্তাল কৰি তোলে ৰাষ্ট্রীয় ঘাইপথ ।

ফলত কিছু সময়ৰ বাবে যান-বাহনৰ চলাচল বন্ধ হৈ পৰে । পিছত প্রশাসনৰ তৎপৰতাত যান-বাহনৰ চলাচল স্বাভাৱিক হয় । চাপৰ নগৰৰ সকলো দোকান-পোহাৰ বন্ধ থাকে ।