নাগৰিকত্ব সংশোধনী বিধেয়ক বাতিলৰ দাবীত বইটামাৰীত কৃষক মুক্তিৰ জোঁৰ সমদল

নাগৰিকত্ব সংশোধনী বিধেয়ক বাতিলৰ দাবীত আৰু বঙালী সংগঠনৰ গণ সমাৱেশৰ বিৰোধিতা কৰি আজি সন্ধিয়া বঙাইগাঁও জিলাৰ বইটামাৰীত কৃষক মুক্তি সংগ্ৰাম সমিতিয়ে জোঁৰ সমদল কৰি ব্যাপক প্ৰতিবাদ সাব্যস্ত কৰে ।

সংগঠনটোৰ বঙাইগাঁও জিলা সমিতিৰ উদ্যোগত আজি সন্ধিয়া বইটামাৰীৰ ঢাকনাবাৰীৰ পৰা এই কাৰ্যসূচী অনুষ্ঠিত হয় । সংগঠনৰ নেতা-কৰ্মীৰ লগতে বহু ৰাইজে ৩১নং ৰাষ্ট্ৰীয় ঘাইপথৰে সমদল কৰি আহি মলিগাঁও চকত উপস্থিত হয় ।

সমদলকাৰী কলে 'বিধেয়ক বাতিল হ'বই লাগিব', 'বিজেপি চৰকাৰ গ' বেক', 'নৰেন্দ্ৰ মোডী হুঁচিয়াৰ', 'কৃষক মুক্তি সংগ্ৰাম সমিতি জিন্দাবাদ' আদি শ্লোগান দিয়া পৰিলক্ষিত হয় । সংগঠনটোৰ বঙাইগাঁও জিলা সমিতিৰ সম্পাদক নন্দন দেৱনাথে বিজেপি চৰকাৰৰ বিৰূদ্ধে সৰৱ হৈ পৰে ।

কোনোপধ্যেই এই বিধেয়ক গৃহীত হ'বলৈ দিয়া নহ'ব বুলি কৃষক নেতাজনে সকীয়াই দিয়ে । কাৰ্যসূচীত কৃষক মুক্তি সংগ্ৰাম সমিতিৰ সভাপতি মহীধৰ ৰায়কে ধৰি সংগঠনৰ  বহু নেতা-কৰ্মী উপস্থিত থাকে ।