নগাঁও কাণ্ডৰ ন্যায়িক তদন্তৰ দাবী; জিএমচিএইচত গুলিবিদ্ধ ছাত্ৰনেতাৰ স্বাস্থ্যৰ বুজ ললে জাতীয় পৰিষদে

নিউজ ডেস্ক:

মুখ্যমন্ত্ৰী ডঃ হিমন্ত বিশ্ব শৰ্মাৰ প্ৰত্যক্ষ পৃষ্ঠপোষকতাত অসমত মুক্তহত্যাৰ পৰিৱেশৰ সূচনা হৈছে৷প্ৰফুল্ল কুমাৰ মহন্ত চৰকাৰৰ দিনত চলা গুপ্তহত্যাৰ আৰ্হিত এইবাৰ হিমন্ত চৰকাৰে আৰক্ষীৰ জৰিয়তে অসমত মুক্ত হত্যা আৰম্ভ কৰিছে-এই বিস্ফোৰক অভিযোগ অসম জাতীয় পৰিষদৰ সভাপতি লুৰীণজ্যোতি গগৈৰ ।দেওবাৰে দুপৰীয়া গুৱাহাটী চিকিৎসা মহাবিদ্যালয় হাস্পতালত নগাঁৱত গুলিবিদ্ধ ছাত্ৰনেতা কীৰ্তিকমল বৰাৰ স্বাস্থ্যৰ বুজ লবলৈ যোৱা গগৈয়ে কয়- অসমত ভয় আৰু ত্ৰাসৰ এটা পৰিৱেশ বৰ্তাই ৰখাৰ বাবেই এনেদৰে চৰকাৰে সামান্য কথাতে নিৰীহ লোকক গুলিওৱাৰ কৌশল অৱলম্বন কৰিছে৷ মুখ্যমন্ত্ৰীয়ে গুৱাহাটীত আৰক্ষী বিষয়াসকলক মাতি আনি ‘এনকাউন্টাৰৰ বিশেষ পেটাৰ্ণ' চলোৱাৰ নিৰ্দেশ দিয়াৰ পিছৰে পৰা এনে পৰিস্থিতিৰ উদ্ভৱ হৈছে বুলি উল্লেখ কৰি গগৈয়ে কয়- আৰক্ষীয়ে বিশেষকৈ ছাত্ৰ আৰু যুৱকসকলক যে টাৰ্গেট কৰি লৈছে সেই কথা ইতিমধ্যে পৰিষ্কাৰ হৈ পৰিছে৷ডিব্ৰুগড়ত ছাত্ৰনেতাক বিনা দোষত প্ৰহাৰ কৰি জেললৈ নিক্ষেপ কৰাৰ পৰা আৰম্ভ কৰি অসমৰ বিভিন্ন ঠাইত এনেদৰে ছাত্ৰ -যুৱক আৰক্ষীৰ দ্বাৰা আক্ৰমণ হোৱাৰ ঘটনা ঘটি আছে।গগৈয়ে কয় যে মূলতঃ প্ৰতিবাদী সত্বাসমূহক নিঃশেষ কৰি চৰকাৰৰ জনবিৰোধী কাৰ্যৰ যাতে বিৰোধিতা কৰিবলৈ কোনেও সাহস কৰিব নোৱাৰে, তাৰ কৌশল হিচাপে আৰক্ষীৰ দ্বাৰা এনে ত্ৰাসৰ ৰাজত্ব চলোৱা হৈছে৷

মুখ্যমন্ত্ৰী ডঃ হিমন্ত বিশ্ব শৰ্মাক মুক্তহত্যাৰ মহানায়ক আখ্যা দি গগৈয়ে লগতে কয়, ‘‘মুখ্যমন্ত্ৰীৰ নিৰ্দেশত অসমত এতিয়া পুলিচৰাজ চলি আছে৷ এনেকুৱা ঘটনাৰ আশংকা আমি আগতেই ব্যক্ত কৰিছিলো৷ আমি কৈছিলো যে দোষীক শাস্তি দিব আদালতে৷ আইনী বিধি-ব্যৱস্থাক নস্যাৎ কৰি আৰক্ষীৰ জৰিয়তে এনকাউন্টাৰেৰে শাস্তি দিয়াৰ এই প্ৰৱনতাৰ পৰিণতি অতি ভয়াৱহ৷ আজি চকুৰ আগত তাৰ প্ৰমাণ পালো৷”

উল্লেখযোগ্য যে আজি গগৈৰ নেতৃত্বত জাতীয় পৰিষদৰ এটা প্ৰতিনিধি দলে গুৱাহাটী চিকিৎসা মহাবিদ্যালয়লৈ গৈ কীৰ্তিকমলৰ স্বাস্থ্যৰ বুজ লয়৷প্ৰতিনিধি দলটোত আছিল দলৰ সম্পাদক অমৃত খাটনিয়াৰ, প্ৰচাৰ সম্পাদক জিয়াউৰ ৰহমান, যুটীয়া সম্পাদক অমিতাভ বৰঠাকুৰ, কেন্দ্ৰীয় কাৰ্যনিৰ্বাহক সদস্য শিশিৰ কলিতা৷

আহত ছাত্ৰনেতাজনৰ কোভিড হোৱা বুলি হাস্পতাল কৰ্তৃপক্ষই দাবী কৰাৰ পৰিপ্ৰেক্ষিতত প্ৰতিনিধি দলটোৱে চিকিৎসা মহাবিদ্যালয়ৰ অধীক্ষক ডাঃ অভিজিৎ শৰ্মাক সাক্ষাৎ কৰে আৰু ছাত্ৰনেতাজনৰ চিকিৎসাৰ ক্ষেত্ৰত যাতে কোনো ত্ৰুটি নহয় তাৰ প্ৰতি সচেষ্ট হ'বলৈ আহ্বান জনায়৷ প্ৰতিনিধি দলটোৱে চিকিৎসাধীন ছাত্ৰনেতাজনৰ পৰিয়ালৰ লোকসকলৰ সৈতেও বাৰ্তালাপ কৰে আৰু ন্যায় প্ৰদানৰ ক্ষেত্ৰত মাত মাতি যোৱাৰ অংগীকাৰ ব্যক্ত কৰে৷

সংবাদ মাধ্যমৰ আগত দলৰ সভাপতি লুৰীণজ্যোতি গগৈয়ে নগাঁৱৰ গুলিচালনাৰ ঘটনাৰ ন্যায়িক তদন্ত দাবী কৰে৷ তেওঁ কয় যে যিহেতু উক্ত ঘটনা চৰকাৰী ‘ডিজাইন' অনুসৰি সংঘটিত হৈছে, গতিকে চৰকাৰী বিষয়াৰ দ্বাৰা নিৰপেক্ষ তদন্ত হ'ব বুলি আশা কৰিব নোৱাৰি৷ গতিকে গুৱাহাটী উচ্চ ন্যায়ালয়ৰ কৰ্মৰত ন্যায়াধীশৰ দ্বৰা উক্ত ঘটনাৰ তদন্ত কৰোৱাব লাগে বুলি তেওঁ মত প্ৰকাশ কৰে৷