বিত্তীয় কেলেংকাৰীৰ অভিযোগত অসম ক্ৰিকেট সংস্থাৰ প্ৰাক্তন সম্পাদক প্ৰদীপ বুঢ়াগোহাঁইক গ্ৰেপ্তাৰ

নিউজ ডেস্ক:

অসম ক্ৰিকেট সংস্থাৰ প্ৰাক্তন সম্পাদক প্ৰদীপ বুঢ়াগোহাঁইক গ্ৰেপ্তাৰ।বিত্তীয় খেলি-মেলি সংক্ৰান্তীয় অভিযোগত কালি পুৱতি নিশা ডিব্ৰুগড় টিংখাঙৰ বাসগৃহৰ পৰা গ্ৰেপ্তাৰ কৰে মহানগৰ আৰক্ষীয়ে।ফটাশিল থানা ৮১৭/২১ নম্বৰ গোচৰত  গ্ৰেপ্তাৰ হয় প্ৰাক্তন সম্পাদক বুঢ়াগোহাঁই।গ্ৰেপ্তাৰ কৰি তেওঁৰ বিৰুদ্ধে ভাৰতীয় দণ্ডবিধি ধাৰা ১২০(খ),৪০৬,৪০৯,৪২০,৪৬৯,৩৪ সংলগ্ন কৰিছে।

উল্লেখ্য যে ২০১৬-১৯ বৰ্ষলৈ  সৰ্বানন্দ সোণোৱাল মুখ্যমন্ত্ৰী হৈ থকা সময়ত সম্পাদক গৰাকীয়ে অসম ক্ৰিকেট সংস্থাৰ বিত্তীয় কেলেংকাৰী সংঘটিত কৰাৰ অভিযোগ আছে।নিবিদা  অবিহনে ৰঙৰ কাম, অনুশীলন ফিল্ডত মাটি পেলোৱা, ছিট নাম্বাৰিঙৰ নামত বৃহৎ পৰিমাণৰ ধন হৰলুকীৰ লগতে বৰ্ষাপাৰা খেল পথাৰৰ আন্তঃগাঁথনি নিৰ্মাণৰ নামত বৃহৎ পৰিমাণৰ পুঁজি আত্মসাতৰ অভিযোগ আছিল।

উল্লেখ্য যে ,বৰ্তমানৰ অসম ক্রিকেট সংস্থাই জামছেদ খানৰ নেতৃত্বত গঠন কৰি দিয়া কমিটিয়ে প্ৰথম পোহৰলৈ আনিছিল কেংলেকাৰী তথ্য।তাৰ ভিত্তিতে এ.চি.এ দাখিল কৰিছিল এজাহাৰ।

গুৰুত্বপূৰ্ণ কথা এই যে অভিযোগ অনুসৰি প্ৰাক্তন সম্পাদক জনে পুত্ৰৰ নামত ৪২টা বিমানৰ টিকট ক্ৰিকেট সংস্থাৰ পৰাই লৈছিল।

সমগ্ৰ ঘটনাৰ সন্দৰ্ভত বৰ্তমানৰ সম্পাদক দেৱজিৎ লন শইকীয়াই কয়-'এইয়া দুখ লগা কথা।এগৰাকী ক্ৰীড়া সংগঠকৰ গ্ৰেপ্তাৰ নিবিচাৰো   ।কিন্তু ক্ৰীড়াৰ নামত অহা ধন কোনো ব্যক্তিয়ে অপব্যয় কৰিব সেইয়াও নিবিচাৰোঁ'।

'প্ৰাক্তন সম্পাদক গৰাকীৰ তিনি বছৰীয়া কাৰ্যকালত প্ৰায় ৬৫ কোটি টকাৰ কাম হৈছিল।ইয়াৰে ১০কোটি টকাৰ খেলি-মেলি হয়'- লন শইকীয়াই লগতে কয়।

ইফালে বুঢ়াগোহাঁইক গ্ৰেপ্তাৰৰ সন্দৰ্ভত ডিচিপি নৱনীত মহন্তই কয়- উপযুক্ত তথ্যৰ প্ৰমাণ পাইছোঁ।যোৱা ৬ডিচেম্বৰত গোচৰ দাখিল কৰিছিল।বুধবাৰে নিশা গ্ৰেপ্তাৰ কৰি অনা হয় গুৱাহাটীলৈ ।