বৰলীয়া নৈৰ দলঙত সমূহীয়া বন্তি প্ৰজ্বলনৰে 'আছু'ৰ শ্বহীদলৈ শ্ৰদ্ধাঞ্জলি

নৰেন শৰ্মা,বাহাৰঘাট:

ৰাজ্যজুৰি অব্যাহত থকা 'কা' বিৰোধী আন্দোলনৰ অংশ হিচাপে বুধবাৰে 'আছু'কে ধৰি ত্ৰিশটা জনগোষ্ঠীয় সংগঠনৰ আহ্বানত আৰু বাহাৰঘাট আঞ্চলিক ছাত্ৰ সন্থাৰ উদ্যোগত 'কা' বিৰোধী আন্দোলনৰ শ্বহীদক স্মৰণ আৰু চৰকাৰৰ সুমতি কামনা কৰি বাহাৰঘাটৰ বৰলীয়া নৈৰ পকী দলঙত সহস্ৰাধিক বন্তি প্ৰজ্বলন কৰে৷আঞ্চলিক ছাত্ৰ সন্থাটোৰ সভাপতি জ্যোতিৰ্ময় গাৰ্গ আৰু সম্পাদক বিকি শৰ্মাৰ নেতৃত্বত কেইবাজনো আছু কৰ্মীয়ে দলংখনৰ দুয়োকাষে বন্তি জ্বলাই শ্বহীদৰ প্ৰতি গভীৰ শ্ৰদ্ধা জনায়।আনহাতে,আঞ্চলিক ছাত্ৰ সন্থাৰ আহ্বানত অঞ্চলটোৰ প্ৰায়ভাগ পৰিয়ালে পদূলিত একোগছি বন্তি প্ৰজ্বলন কৰি শ্বহীদলৈ শ্ৰদ্ধা জনায়৷তদুপৰি,স্থানীয় ৰাইজৰ সহযোগত বিভিন্ন 'কা' বিৰোধী শ্লোগানৰে পৰিৱেশ উত্তাল কৰাৰ লগতে শ্বহীদসকলৰ আত্মাৰ সদগতি আৰু আহতসকলৰ আশুআৰোগ্য কামনা কৰে।