মৰিগাঁৱত এন আৰ চিৰ ভুৱা নথি যোগানকাৰী চক্ৰ আটক

মৰিগাঁও ,১৭ মে :

ৰাষ্ট্ৰীয় নাগৰিক পঞ্জীত একাংশ লোকে ভূৱা নথি পত্ৰৰে নিজৰ নাম সোমোৱাবলৈ অহৰহ চেষ্টা অব্যাহত ৰখাৰ সময়তে আজি  মৰিগাঁৱত  এন আৰ চিৰ ভুৱা নথিপত্ৰ প্ৰস্তুতকাৰী এটা চক্ৰ গ্ৰেপ্তাৰ হোৱা ঘটনাই ব্যাপক চাঞ্চল্য সৃষ্টি কৰিছে।

জানিব পৰা মতে  জাগীৰোডৰ এটা এন আৰ চি পৰীক্ষণ কেন্দ্ৰই ৰোকচানা খাতুন নামৰ মহিলাগৰাকীক তেওঁৰ নথিপত্ৰ এন আৰ চি কেন্দ্ৰত পুনৰীক্ষণৰ বাবে এন আৰ চি কৰ্তৃপক্ষক জমা দিবলৈ কোৱাত  মহিলাগৰাকীয়ে জমা দিয়া জন্মৰ প্ৰমান পত্ৰত  দুটাকৈ জন্মৰ তাৰিখ  (১-১-০১)  আৰু আৰু (১-১-১৯৯৬) বুলি উল্লেখ থকাৰ লগতে দুয়োখন জন্মৰ প্ৰমানপত্ৰৰে ক্ৰমিক নং ০৯৪৭২৮ আৰু ২৯৯৭২৮ বুলি উল্লেখ থকাত এন আৰ চি পৰীক্ষণ বিষয়া গৰাকীয়ে জাগীৰোড থানাত  এক গোচৰ (২৯৭/১৯ নং) ৰুজু কৰে ৷

সেইমৰ্মে আৰক্ষীয়ে অভিযান চলাই মৈৰাবাৰী বৰথল দলৈগাৱৰ পৰা মোজ্জামিল হুছেইনক গ্ৰেপ্তাৰ কৰাৰ লগতে মোজ্জামিলৰ স্বীকাৰোক্তিৰ ভিত্তিত গৰৈমাৰী বিল নিগম প্ৰাথমিক বিদ্যালয়ৰ শিক্ষক হজৰত আলীক কৰায়ত্ত কৰে ৷ আৰক্ষীয়ে ধৃত লোক দুজনৰ জিম্মাৰ পৰা ৭১ খন জন্মৰ প্ৰমান পত্ৰ, দুখন মৃত্যুৰ প্ৰমানপত্ৰ, ১৩ খন পান কাৰ্ড, ১৫৮ খন গাঁওবুঢ়াৰ প্ৰমানপত্ৰ আৰু চাৰিখন ভোটৰ আই ডি কাৰ্ডৰ লগতে বিভিন্ন ধৰণৰ নথিপত্ৰ জব্দ কৰিছে ৷ চক্ৰটোত আৰু বহুলোক জড়িত থকাৰ সন্দেহ কৰি ব্যাপক তদন্ত আৰম্ভ কৰিছে আৰক্ষীয়ে ৷