চীনত কৰ্মৰত অসমীয়া অভিযন্তাৰ আদৰ্শ : নিজৰ ধনেৰে ডিব্ৰুগড়ত নিৰ্মাণ কৰিলে পথ

ল'ৰাজনৰ নাম গৌতম বৰদলৈ ৷ ডিব্ৰুগড় চৰকাৰী উচ্চতৰ মাধ্যমিক বালক বিদ্যালয়ৰ এসময়ৰ কৃতী ছাত্ৰজনে বৰ্তমান চীন দেশত নিজাকৈ এটা কোম্পানী খুলি ব্যৱসায় কৰি আছে ৷

বৈৰাগীমঠৰ ছল্ট ব্ৰুক কলেজৰ সমীপত Ceramic Engineer গৌতমৰ ঘৰ ৷ ডিব্ৰুগড় তথা অসমৰ এজন প্ৰখ্যাত সাংবাদিক প্ৰয়াত হেৰম্ব বৰদলৈ গৌতমৰ দেউতাক ৷

১৩ বছৰ ধৰি চীনত থকা গৌতম যেতিয়াই ঘৰলৈ আহে নবীন চন্দ্ৰ বৰদলৈ মূল পথ (কনভয় ৰোড)ৰ পৰা নিজৰ ঘৰলৈ সোমোৱা ৰাস্তাটোত ভৰি দিলেই মনটো সেমেকি উঠে ৷

কেঁচা, ওখোৰা-মোখোৰা ৰাস্তা, বাৰিষা পানীৰ ডোঙা, কাষৰ নলাৰ ঢেকীয়া, কচুৰে পোত খাই থাকে ৷ চকুৰ আগত ভাহি উঠে চীন দেশৰ পৃথিৱী বিখ্যাত উন্নত প্ৰযুক্তিৰে নিৰ্মিত ৰাস্তাসমূহ ৷

বহুতকে নিজৰ ঘৰৰ সমুখৰ ৰাস্তাটোৰ মেৰামতি তথা পুনৰ নিৰ্মাণৰ অনুৰোধ কৰিলে ৷ বহু বছৰ প্ৰতীক্ষাৰ অন্ততো যেতিয়া ৰাস্তাটো একেদৰে থাকিল গৌতমে নিজাকৈ এটা সুন্দৰ আঁচনি গ্ৰহণ কৰিলে ৷

প্ৰায় ৩০০ মিটাৰ ৰাস্তাটোৰ বাবে আৰ চিচ নলাসহ কংক্ৰীট ব্লক, পিভিচি গতি ৰোধক, সৌৰ ষ্ট্ৰীট লাইট, ৰোড ৰিফ্লেক্টৰ, ৰোড কনভেক্স মিৰ'ৰ,, চিচি টিভি কেমেৰা ইত্যাদিৰে নিৰ্মাণ কৰে ৰাস্তাটো ৷

বৰ্তমান গৌতমৰ একক প্ৰচেষ্টাত এই সকলো সুবিধাৰে 'হেৰম্ব বৰদলৈ পথ' ৷ বহু লক্ষ ধন ব্যয় কৰিলে গৌতমে ৷ ৰাইজ তথা সমাজৰ হিতৰ স্বাৰ্থত ৷ 'ছেফ এণ্ড স্মাৰ্ট ডিব্ৰুগড়'ৰ সপোন দেখা গৌতম আমাৰ সকলোৰে বাবে আদৰ্শ হৈ ৰওক ৷