জ্যেষ্ঠ সাংবাদিক অদীপ কুমাৰ ফুকনলৈ ২০১৮ বৰ্ষৰ বাবা চাহেব বঁটা

২০১৮ বৰ্ষৰ বাবে বাবা চাহেব বঁটা অসমৰ বিশিষ্ট বুদ্ধিজীৱী, সাংবাদিক তথা বিশিষ্ট সমাজ সচেতন ব্যক্তি হিচাপে অসমৰ জাতীয় জীৱনলৈ অনবদ্য বৰঙণি আগবঢ়োৱা অদীপ কুমাৰ ফুকনলৈ আগবঢ়োৱা হৈছে ৷

উল্লেখ্য যে এই বঁটা অসম অনুসূচিত জাতি যুৱ-ছাত্ৰ সন্থাই প্ৰতি বছৰে ৰাজ্যখনৰ সমাজ জীৱনলৈ অনবদ্য বৰঙনি আগবঢ়োৱা একোগৰাকীকৈ ব্যক্তিলৈ আগবঢ়াই আহিছে ৷

অহা ৬ ডিচেম্বৰত গুৱাহাটীৰ দীঘলীপুখুৰীপাৰত অনুষ্ঠিত হ'বলগা ৰাজ্যিক পৰ্যায়ৰ বাবা চাহেব ভীমৰাও আম্বেদকাৰৰ মহাপ্ৰয়াণ দিৱসত প্ৰদান কৰা হ'ব । এই বঁটাত থাকিব নগদ ধনৰ লগতে শৰাই, মানপত্ৰ, গামোচা আদি ৷

আনহাতে, জামুগুৰি উচ্চতৰ মাধ্যমিক বিদ্যালয়ৰ সহকাৰী শিক্ষক ভূপেন দাসক কৃতী শিক্ষকৰ বঁটা প্ৰদান কৰা হ'ব একেটা অনুষ্ঠানতে ৷ অসম অনুসূচিত জাতি যুৱ-ছাত্ৰ সন্থাই সংবাদ মাধ্যমলৈ প্ৰেৰণ কৰা এক প্ৰেছ বিজ্ঞপ্তিযোগে এই কথা প্ৰকাশ কৰিছে ৷

উল্লেখ্য যে একেটা বিজ্ঞপ্তিতে সন্থাটোৱে বৃহস্পতিবাৰে সংঘটিত নৰসংহাৰৰ ঘটনাক তীব্ৰ গৰিহণা দিয়াৰ লগতে দোষীক গ্ৰেপ্তাৰ কৰি কঠাৰতম শাস্তি প্ৰদানৰ দাবী জনাইছে ৷