নগাঁও আৰক্ষীৰ জালত চাঞ্চল্যকৰ ননৈ হত্যাকাণ্ডৰ তিনি মূল অভিযুক্ত

জুৰীয়াৰ পৰা উত্তম কুমাৰ বৰা

যোৱা ২২ অক্টোবৰৰ সন্ধ্যা ননৈ খাটৰগাঁৱৰ নিজগৃহত গুলীয়াই হত্যা কৰা হৈছিল প্ৰাক্তন সেনা জোৱান দীপেন নাথক । হত্যাকাণ্ডত জড়িত প্ৰণৱ নাথ, ৰাজীৱ বণিক আৰু চুলতান আলীক গ্ৰেপ্তাৰ কৰিছে আৰক্ষীয়ে ।

দুৰ্ধৰ্ষ 'চুপাৰী কিলাৰ' ৰাজীৱ বণিকে শূন্য দূৰত্বৰ পৰা গুলীয়াইছিল দীপেন নাথক । প্ৰণৱ নাথে ব্যৱসায়িক কথা-বতৰাৰ চলৰে মাতি নিছিল নিহত দীপেন নাথক ।

কুখ্যাত ডকাইত চুলতান আলীৰ বাইকত পলায়ন কৰিছিল ৰাজীৱ বণিক আৰু প্ৰণৱ নাথে । হত্যাকাণ্ড সংঘটিত হোৱাৰ পিছদিনাই নগাঁও আৰক্ষী অধীক্ষক শংকৰব্ৰত ৰায়মেধিৰ নেতৃত্বত যোৱা এটা দলে গ্ৰেপ্তাৰ কৰিছিল প্ৰণৱ নাথক ।

প্ৰণৱ নাথৰ স্বীকাৰোক্তিৰ ভিত্তিত শনিবাৰে দিনৰ ১১ বজাত ৰহা কাকতিগাঁৱৰ পৰা ৰহাৰ ভাৰপ্ৰাপ্তবিষয়া মলয় আচাৰ্জীয়ে গ্ৰেপ্তাৰ কৰে দুধৰ্ষ অপৰাধী ৰাজীৱ বণিকক ।

ৰাজীৱ বণিকৰ স্বীকাৰোক্তিৰ ভিত্তিত নগাঁৱৰ অতিৰিক্ত আৰক্ষী অধীক্ষক ৰিপুল দাসৰ নেতৃত্বত অসামৰিক পোছাকত যোৱা আৰক্ষীৰ এটা দলে দিনৰ ২ বজাত নগাঁও বাইপাছৰ সুগন্ধি ধাবাৰ পৰা গ্ৰেপ্তাৰ কৰে চুলতান আলীক ।

ইতিমধ্যে নগাঁৱৰ উপ-আৰক্ষী অধীক্ষক জন দাস, পদ্ম পেগু আৰু ৰহাৰ ভাৰপ্ৰাপ্ত বিষয়া মলয় আচাৰ্যৰ নেতৃত্বত যোৱা এটা দলে বাক্সাৰ তামুলপুৰৰ পৰা হত্যাকাণ্ডত ব্যৱহৃত পিষ্টল আৰু পালছাৰ বাইকখন জব্দ কৰিছে ।