তামুলপুৰত বিজয়ী কাবাডী দলক বিপুল সম্বৰ্ধনা

তিনিচুকীয়াত যোৱা ২৮, ২৯ আৰু ৩০ ছেপ্টেম্বৰত অনুষ্ঠিত ৩৮সংখ্যক আন্ত:জিলা জুনিয়ৰ ছোৱালী কাবাডী প্ৰতিযোগিতাত  চেম্পীয়নশ্বিপ অৰ্জন কৰি তামুলপুৰলৈ সন্মান কঢ়িয়াই অনা তামুলপুৰ জিলা ছোৱালী কাবাডীৰ দলটোক আজি আবেলি তামুলপুৰ জিলা ক্ৰীড়া সন্থাৰ কাৰ্যালয়ত বিপুল সম্বৰ্ধনা জ্ঞাপন কৰা হয় ।

তামুলপুৰ জিলা ক্ৰীড়া সন্থাৰ সাধাৰণ সম্পাদক কমলাকান্ত বড়োৱে আঁতধৰা আৰু কাৰ্যকৰী সভাপতি মহেন্দ্ৰ নাথ দাসৰ সভাপতিত্বত অনুষ্ঠিত সম্বৰ্ধনা সভাত কাবাডী দলটোক তামুলপুৰ জিলা ক্ৰীড়া সন্থাৰ লগতে তামুলপুৰ আৰু গয়বাৰী ব্লক বি পি এফ, মহিলা বি পি এফ, তামুলপুৰ প্ৰেছ ক্লাবকে আদি কৰি তামুলপুৰৰ বিভিন্ন দল-সংগঠনে বিপুল সম্বৰ্ধনা জ্ঞাপন কৰে । সভাত দলটোৰ পৰিচালক মীনা বড়ো আৰু প্ৰশিক্ষক কিৰণ সৰকাৰকো সম্বৰ্ধনা জ্ঞাপন কৰা হয় ।

সভাত তামুলপুৰ ব্লক বি পি এফৰ সম্পাদক অভিজিৎ দাস দেউৰী, মহিলা বি পি এফৰ দীপালী ডেকা, তামুলপুৰ  প্ৰেছ ক্লাবৰ সম্পাদক চক্ৰেশ্বৰ ডেকা আদিয়ে বক্তব্য প্ৰদান কৰে ।