৩ অক্টোবৰত দিছপুৰ কঁপাব চাকৰী বঞ্চিত জনস্বাস্থ্য কৰ্মচাৰীয়ে

দেওবাৰে দিছপুৰ প্ৰেছ ক্লাৱত আয়োজন কৰা এখনি সংবাদমেলত সমন্বয় সমিতিৰ আহ্বায়ক বিকাশ দেয়ে কয় যে কৰ্মচাৰীসকলে চৰকাৰৰ পৰা কোনো ধৰণৰ দৰমহা পোৱা নাই আৰু যাৰ ফলস্বৰূপে ৩ অক্টোবৰত দিছপুৰ লাষ্টগেটত প্ৰতিবাদী কাৰ্যসূচী ৰূপায়ণ কৰাৰ কথাও তেওঁ জানিবলৈ দিয়ে । 

তদুপৰি ২০১৪ চনতে মাথো জানুৱাৰী-ফেব্ৰুৱাৰী এই দুমাহৰ বাবে মাত্ৰ ১০ হাজাৰ টকা দিছিল আৰু পিছৰ চাৰিমাহ মিলাই একেলগে ২০ হাজাৰ টকা মাননী হিচাপে চৰকাৰৰ ফালৰ পৰা দিছিল । তাৰ পাছৰে পৰা ৰাজ্যখনৰ ৭৯৬১ গৰাকী কৰ্মচাৰীয়ে চৰকাৰৰ পৰা কোনোধৰণৰ দৰমহা  নোপোৱাকৈ জনস্বাস্থ্য কাৰিকৰী বিভাগৰ অধীনত কাম কৰি আছে বুলি সংবাদমেলত বিকাশ দেই এই কথা জনায় । 

উল্লেখ্য যে চৰকাৰৰ ফালৰ পৰা কোনো নিয়মীয়া দৰমহা নোপোৱাকৈ কামৰূপ মহানগৰ জিলাৰ বিশেষকৈ গুৱাহাটীৰ উপকন্ঠ অঞ্চলত উক্ত কৰ্মচাৰীসকলৰ মাজৰে কেইগৰাকীমানে কিছু সংখ্যক আঁচনিৰ কাম নিয়াৰিকৈ কৰি আছে । তাৰ পৰা চৰকাৰে সুনাম অৰ্জন কৰি আছে বুলিও এক অভিযোগ কৰে । 

আনহাতে, বহু চহৰ নগৰ অথবা গ্ৰামাঞ্চলত জলস্তৰ নামি যোৱাৰ ফলত তথা বিদ্যুৎৰ লুকা-ভাকু চলি থকাৰ বাবে কৰ্মচাৰীসকলে নিশা বহু দেৰিলৈকে নতুবা ওৰে নিশা উজাগৰে থাকি পানী উঠোৱাৰ অপেক্ষা কৰিবলগীয়া হয় । 

উদ্বেগজনক কথা যে এনেধৰণৰ কষ্টকৰ কাম কৰাৰ উপৰিও পৰিয়াল পোহ-পাল দিয়াৰ বাবে দিনৰভাগত কৰ্মচাৰীসকলে দিন হাজিৰা কৰিবলগীয়া হয় । সেয়েহে আজিৰ সংবাদমেলৰ জৰিয়তে জনস্বাস্থ্য কাৰিকৰী বিভাগৰ মন্ত্ৰী ৰিহন দৈমাৰীক কৰ্মচাৰীসকলৰ প্ৰাপ্য মজুৰি দিয়াৰ দাবী জনোৱাৰ উপৰিও ১০,৫০০ টকা মাহিলী দৰমহা দিয়াৰ বাবেও দাবী জনায় । 

আনহাতে, বৰ্তমান চৰকাৰে নিৰ্মাণ কৰি দিয়া কমিটিখনেও কৰ্মচাৰীসকলক দিবলগীয়া ধন নিদিয়াৰ অভিযোগ তুলি লগতে কয় "২০১৩ চনতে চৰকাৰে মাহিলী হিচাপত মাহে ৫ হাজাৰ টকাৰ টকা দিবৰ বাবে নিৰ্দেশ দিছিল যদিও মাত্ৰ ৩ হাজাৰ টকাহে দিয়ে কমিটিখনে । "বিনা বেতনেৰে সেৱা আগবঢ়াই অহা এইসকল কৰ্মচাৰীয়ে দীৰ্ঘদিন ধৰি নিয়মীয়াভাৱে দৰমহা লাভ কৰাৰ দাবী জনাই মুখ্য মন্ত্ৰী আৰু বিভাগীয় মন্ত্ৰীক স্মাৰক-পত্ৰ প্ৰদান কৰি আহিছিল । কিন্তু চৰকাৰে কোনো ব্যৱস্থা নোলোৱাৰ বাবে প্ৰতাৰিত এইসকল কৰ্মচাৰীয়ে প্ৰথমবাৰলৈ দিছপুৰ লাষ্টগেটত প্ৰতিবাদত নামিব ।