অপৰাধীক ৰাজনীতিত প্ৰৱেশত বাধা দিবলৈ সংসদক আইন প্ৰণয়নৰ আহ্বান সৰ্বোচ্চ ন্যায়ালয়ৰ

দাগী অপৰাধীসকলৰ ৰাজনীতিত প্ৰৱেশ ৰোধৰ বাবে দেশবাসীয়ে দীৰ্ঘ দিন ধৰি কৰা আকাংক্ষা পুনৰ মৰহি গ’ল ৷ ৰাজনীতিত অপৰাধীৰ প্ৰৱেশক ‘দুৰ্ভাগ্যজনক’ বুলি আখ্যা দিয়াৰ পিছতো সৰ্বোচ্চ ন্যায়ালয়ে ইয়াক বাধা দিয়াৰ দায়িত্ব সংসদৰ ওপৰতে এৰি দিলে ৷

মঙলবাৰে সৰ্বোচ্চ ন্যায়ালয়ৰ মুখ্য ন্যায়াধীশ দীপক মিশ্ৰৰ নেতৃত্বাধীন পাঁচ সদস্যৰ বিচাৰপীঠে অপৰাধীসকলক ৰাজনীতিত প্ৰৱেশত বাধা দিবলৈ অস্বীকাৰ কৰে ৷ বৰং সৰ্বোচ্চ ন্যায়ালয়ে ৰাজনীতিক অপৰাধীমুক্ত কৰাৰ বাবে আইন প্ৰণয়ন কৰাৰ দায়িত্ব সংসদৰ ওপৰতে এৰি দিয়ে ৷

উল্লেখ্য যে ‘এছোচিয়েচন অব্‌ ডেম'ক্ৰেটিক ৰিফৰ্ম' নামৰ এক সংস্থাৰ সমীক্ষা অনুসৰি, বৰ্তমান লোকসভাৰ সাংসদসকলৰ ভিতৰত গুৰুতৰ ফৌজদাৰী অপৰাধৰ গোচৰত অভিযুক্তৰ সংখ্যা চৰকাৰৰ প্ৰধান শাসক দল বিজেপিৰ ভিতৰতে সৰ্বাধিক ৷

বিজেপিৰ কমেও ২২ শতাংশ অৰ্থাৎ ৯৪জন সাংসদৰ বিৰুদ্ধে গুৰুতৰ ফৌজদাৰী অপৰাধৰ গোচৰ চলি আছে ৷ আনহাতে, অপৰাধী সাংসদৰ সংখ্যাৰ ক্ষেত্ৰত দ্বিতীয় স্থানত আছে শিৱসেনা ৷

শিৱসেনাৰ কমেও ১৫জন সাংসদৰ বিৰুদ্ধে ফৌজদাৰী অপৰাধৰ গোচৰ চলি আছে ৷ মঙলবাৰে সৰ্বোচ্চ ন্যায়ালৰ পাঁচজনীয়া বিচাৰপীঠে এক ৰায়ত কয় যে অপৰাধৰ গোচৰত অভিযুক্ত প্ৰতিজন প্ৰাৰ্থীয়েই নিৰ্বাচন আয়োগৰ ওচৰত তেওঁলোকৰ বিৰুদ্ধে চলি থকা গোচৰসমূহৰ সবিশেষ তথ্য দাখিল কৰিব লাগিব ৷

তদুপৰি, সংশ্লিষ্ট ৰাজনৈতিক দলবিলাকেও তেওঁলোকৰ প্ৰাৰ্থীসকলৰ বিষয়ে সকলো তথ্য তেওঁলোকৰ বেৱছাইটত প্ৰচাৰ কৰিব লাগিব ৷ সৰ্বোচ্চ ন্যায়ালয়ে এই নিৰ্দেশৰ উপৰি আন এক নিৰ্দেশত কয় যে ৰাজনৈতিক দলবিলাকে ইলেক্ট্ৰ'নিক আৰু ছপা মাধ্যমৰ যোগেদিও তেওঁলোকৰ প্ৰাৰ্থীসকলৰ সকলো তথ্য ব্যাপকভাৱে প্ৰচাৰ কৰিব লাগিব ৷

লগতে অপৰাধীক ৰাজনীতিত প্ৰৱেশত বাধা প্ৰদান কৰিবলৈ সংসদক আইন প্ৰণয়নৰ বিষয়ে বিবেচনা কৰিবলৈও আহ্বান জনায় সৰ্বোচ্চ ন্যায়ালয়ে ৷ ২০১১ চনত পাব্লিক ইণ্টাৰেষ্ট ফাউণ্ডচন নামৰ এটা স্বেচ্ছাসেৱী সংস্থাই অপৰাধী তথা ফৌজদাৰী গোচৰত অভিযুক্ত ব্যক্তিসকলক নিৰ্বাচনত প্ৰতিদ্বন্দ্বিতা কৰাৰ পৰা বিৰত ৰখাৰ দাবী জনাই সৰ্বোচ্চ ন্যায়ালয়ত এখন আবেদন দাখিল কৰিছিল ৷

ঘৃণনীয় অপৰাধত যুক্ত তথা পাঁচ বছৰৰ অধিককাল কৰাদণ্ড ভোগ কৰা অপৰাধীক নিৰ্বাচনত প্ৰতিদ্বন্দ্বিতা কৰা নিষিদ্ধ কৰাৰো দাবী জনোৱা হৈছিল উক্ত আবেদনত ৷ এই গোচৰৰ শুনানিতেই যোৱা মাৰ্চ মাহত কেন্দ্ৰীয় চৰকাৰে এক শপতনামাত জনাইছে যে বৰ্তমান দেশৰ মুঠ ১,৭৬৫জন সাংসদ-বিধায়কৰ ভিতৰত এক-তৃতীয়াংশৰ বিৰুদ্ধেই বিভিন্ন ফৌজদাৰী অপৰাধৰ গোচৰ চলি আছে ৷

মঙলবাৰে সৰ্বোচ্চ ন্যায়ালয়ে দিয়া ৰায়ক এছোচিয়েচন অব্‌ ডেম'ক্ৰেটিক ৰাইটছৰ সদস্যই ‘হতাশজনক’ বুলি আখ্যা দিয়ে ৷ সৰ্বোচ্চ ন্যায়ালয়ৰ পাঁচজনীয়া বিচাৰপীঠৰ অন্যান্য ন্যায়াধীশসকল হৈছে ফলি নৰিমেন, এ এম খাউইলকৰ, কি ৱাই চন্দ্ৰচূড় ৷