বৰচিলাত সমূহীয়া চাফাই অভিযান

নিজ অঞ্চলৰ চৌপাশৰ পৰিবেশ নিকা, প্ৰদূষণমুক্ত কৰি এখন সুস্থ-নিকা ভাৰত গঢ়াত সহযোগ কৰাৰ উদ্দেশ্য আগত ৰাখি আজি বটদ্ৰৱা সমষ্টিৰ অন্তৰ্গত বৰচিলাত এক সমূহীয়া চাফাই অভিযান কাৰ্যসূচী ৰূপায়িত কৰে গঁঞা ৰাইজে । পুৱাৰ ভাগত বৰচিলা গাঁৱৰ শিশুৰ পৰা যুৱক, বৃদ্ধলৈকে প্ৰায় তিনি শতাধিক লোকে হাতে-হাতে, দা-কোৰ, কটাৰী, পাচি লৈ ৰাজপথলৈ ওলাই আহি প্ৰায় তিনি কিল'মিটাৰ দৈৰ্ঘ্যৰ বৰচিলা-দলংঘাট সংযোগী পথছোৱাৰ দুয়োকাষে, বৰচিলাৰ সমূহীয়া নামঘৰ, মন্দিৰ, বাটচ'ৰাৰ চৌপাশে চাফাই কাৰ্যসূচী চলায় ।

অন্যহাতে, গাঁওবাসীয়ে অনাগত দিনটো বৰচিলাখনক এখন পৰিস্কাৰ আৰু সেউজ গাঁও হিচাপে গঢ়ি তুলিবলৈ এনে কাৰ্যসূচী ৰূপায়ণ কৰি যাব বুলি সংকল্প গ্ৰহণ কৰে । উল্লেখ্য যে,পঞ্চায়ত অথবা প্ৰশাসনৰ পদক্ষেপলৈ বাট চাই নাথাকি সমূহীয়া শ্ৰম দানেৰে বৰচিলাবাসী ৰাইজে তিনি কিল'মিটাৰৰো অধিক দৈৰ্ঘ্যৰ এলেকাত নিকা কৰি তোলা কাৰ্যই এক সুন্দৰ দৃষ্টান্ত দাঙি ধৰিলে ।