বঙাইগাঁৱত মাৰণাস্ত্ৰসহ এন ডি এফ বি (এছ) সদস্য আটক 

বঙাইগাঁও চহৰৰ উত্তৰ বঙাইগাঁৱৰ পালপাৰাস্থিত মিছন এখনৰ অতিথিশালাত মাৰণাস্ত্ৰসহ আশ্ৰয় লৈ থকা অৱস্থাত যোৱা নিশা সেনা- আৰক্ষীয়ে অভিযান চলাই এজন এন ডি এফ বি (এছ)সদস্যক আটক কৰে ৷ এক গোপন সূত্ৰৰ খবৰৰ ভিত্তিত সেনা-আৰক্ষীয়ে আটক কৰা সদস্যজন চিৰাং জিলাৰ আমগুৰি থানাৰ অন্তৰ্গত আমটেগাৰ ফিলিমন নাৰ্জাৰী (২৭) বুলি আৰক্ষীয়ে প্ৰকাশ কৰিছে ৷ আটকাধীন  সদস্যজনৰ পৰা অভিযানকাৰী দলটোৱে এটা ৭.৬৫ এম এম পিষ্টল, এটা মেগজিন আৰু তিনিটা সজীৱ গুলি উদ্ধাৰ কৰে ৷ আৰক্ষীয়ে প্ৰকাশ কৰা মতে সেনা বাহিনীৰ পঞ্চম গাড়োৱাল ৰেজিমেন্টে গোপন খবৰৰ ভিত্তিত যোৱা নিশা ১:৩০ মান বজাত বঙাইগাঁও আৰক্ষীৰ সৈতে অতিথিশালাটোত অভিযান চলাইছিল আৰু এই অভিযান কালতে এন ডি এফ বি সদস্যজনক আটক কৰা হয় ৷

ধৃত সদস্যজন ধন দাবীৰ বিভিন্ন ঘটনাৰ সৈতে জড়িত থকাৰ লগতে জনমানসত থাকি সেনা-আৰক্ষীৰ গতিবিধি নিৰীক্ষণ কৰি সংগঠনটোৰ উচ্চ পৰ্যায়ৰ নেতাক যোগান ধৰি আহিছিল ৷ ফিলিমন নাৰ্জাৰী সংগঠনটোৰ দুৰ্ধষ সদস্য জৰ্দান নাৰ্জাৰীৰ সহযোগী আছিল বুলিও সেনা সূত্ৰই দাবী কৰিছে ৷ ধৃত সদস্যজনৰ বিৰুদ্ধে ইতিমধ্যে বঙাইগাঁও থানাত ৭৪০/১৮ নম্বৰৰ এক গোচৰ ৰুজু কৰি জেৰা অব্যাহত ৰাখিছে সেনা-আৰক্ষীয়ে ৷ ইপিনে আটকাধীন ফিলিমন নাৰ্জাৰীয়ে সংবাদ মাধ্যমৰ আগত প্ৰকাশ কৰা মতে ২০০৯ চনতে সংগঠন ত্যাগ কৰিছিল ৷ পিছত বাংগালোৰ আৰু বৰ্তমান মুম্বাইত কাম-কাজ কৰি আছিল ৷ সদস্যজনে মিছাকৈয়ে অভিযোগ অনাৰ লগতে পিষ্টলটোও তেওঁৰ নহয় বুলিহে কয় ৷