"গুৱাহাটীবাসীলৈ ভাল খবৰ,ঘৰে-ঘৰে লাভ কৰিব পাইপ গেছৰ সেৱা"-ৰূপম গোস্বামী

"গুৱাহাটীবাসীৰ বাবে ভাল খবৰ।ৰন্ধন গেছৰ ছিলিণ্ডাৰ ক্ৰয়ৰ বাবে এজেঞ্চিত গৈ দীঘলীয়া শাৰী পতাৰ সমস্যাৰ শীঘ্ৰে সমাধান হ'ব।ডিএনপি লিমিটেডে কামৰূপ(ম), কামৰূপ গ্ৰাম্যৰ জনতাক ঘৰে ঘৰে যোগান ধৰিব পাইপ গেছ সেৱা।আগন্তক ৬-৯ মাহৰ ভিতৰত লাভ কৰিব এই সুবিধা"-এই কথা ঘোষণা ডিএনপি লিমিটেডৰ অধ্যক্ষ ৰূপম গোস্বামীৰ। উল্লেখ যে শিলচৰত ডিএনপি পাইপ গেছ সেৱা ইতিমধ্যে আৰম্ভ হোৱা বুলি উল্লেখ কৰি গোস্বামীয়ে কয়-"কামৰূপ(ম)ত ক'ৰ'নাৰ বাবে কিছু পলম হৈছিল।"

গুৰুত্বপূৰ্ণ যে ৬ হাজাৰ কোটি টকা ব্যয়েৰে বাৰাউনীৰ পৰা গেছ অনাৰ বাবে পাইপ লাইনৰ কাম চলি থকা বুলি অধ্যক্ষগৰাকীয়ে কয়। "উদ্যোগ কৰিবলৈ বিচৰা যুৱক-যুৱতীৰ বাবে সুবিধাজনক হ'ব গেছ সেৱা।ৰাজ্যত বিদ্যুৎ সমস্যা আছে।তাৰ বাবে বহুতো উদ্যোগ যিদৰে আগবাঢ়িব লাগিছিল সেইদৰে আগবাঢ়িব পৰা নাই।কিন্তু এই গেছ সেৱাই কম খৰছত উদ্যোগীসকলৰ সহায়ক হ'ব"-গোস্বামীয়ে কয়। বৰ্তমান এলপিজি গেছ ক্ৰয় কৰাৰ বাবে ৮০০-৯০০টকাৰ প্ৰয়োজন হৈ আহিছে।কিন্তু পাইপ গেছ হ'লে ব্যয় কৰিব লাগিব ৩৫০-৪০০টকা বুলিও লগতে তেওঁ কয়।

প্ৰথম পৰ্যায়ত ১০ হাজাৰ পৰিয়ালক সামৰি ল'ব এই সেৱাত।