বাটসৰত ডিঙি কটা অৱস্থাত যুৱতীৰ মৃতদেহ উদ্ধাৰ

নলবাৰীৰ পৰা হেমন্ত কলিতা:

নলবাৰী জিলাৰ বাটসৰ দুৰ্গা মন্দিৰৰ সমুখত সোমবাৰে নিশা ৮-৪০ বজাত এগৰাকী যুৱতীক হত্যা কৰি থৈ যোৱা ঘটনাই চাঞ্চল্যৰ সৃষ্টি কৰিছে।ঘটনাৰ বিৱৰণী অনুসৰি নিশা ৮-৪০ মান বজাত এগৰাকী যুৱতীৰ বিকট চিঞৰ শুনা পাই ওচৰ চুবুৰীয়া ওলাই আহি দেখে যে জিন্স পেন্ট পিন্ধা,কান্ধত বেগ থকা এগৰাকী যুৱতী ছটফটাই পৰি আছে।উল্লেখযোগ্য যে যুৱতীগৰাকীৰ মৃতদেহ ডিঙি কটা অৱস্থাত আছিল। ইতিমধ্যে মৃত্যু হোৱা যুৱতীগৰাকীৰ মৃতদেহ দেখি হুৱাদুৱা লাগে । লগে লগে লোকাৰণ্য হৈ পৰে দুৰ্গা মন্দিৰ চৌহদ।এই পৰ্যন্ত যুৱতীগৰাকীৰ নাম-ঠিকনা জানিব পৰা হোৱা নাই। ঘটনাস্থলীত বেলশৰ আৰক্ষী উপস্থিত হৈ অনুসন্ধান আৰম্ভ কৰিছে যদিও এতিয়ালৈ আৰক্ষীয়ে কোনো শুং -সূত্ৰ লাভ কৰা নাই। লকডাউন চলি থকাৰ মাজতে যুৱতীগৰাকীৰ বিচৰণ আৰু ডিঙি ৰেপি হত্যা কৰা ঘটনাই বৃহত্তৰ অঞ্চলটোত চাঞ্চল্যৰ সৃষ্টি কৰিছে।