গোলাঘাট জিলা উপায়ুক্তৰ সংবাদ মেল:৭ মে'ৰ পৰা ঘৰে ঘৰে হ'ব ক'ভিড -১৯ৰ পৰীক্ষা

গোলাঘাটৰ পৰা মীনাক্ষি ফুকন:

ক' ভিড - ১৯ ৰ লগত মুখামুখি হ'বলৈ ৰাজ্য চৰকাৰৰ নিৰ্দেশ অনুসৰি গোলাঘাটতো সাজু হৈছে জিলা প্ৰশাসন।মঙলবাৰে জিলা উপায়ুক্তৰ সভাকক্ষত  অনুষ্ঠিত হোৱা সংবাদ মেলত এই কথা সদৰি কৰে উপায়ুক্ত বিভাস চন্দ্ৰ মোডীয়ে। জিলাখনৰ প্ৰায় দুই লাখ চৌত্ৰিছ হাজাৰ ঘৰত হ'ব ক'ভিড - ১৯ৰ পৰীক্ষণ।ইতিমধ্যে আঠাৱন্নটা স্বাস্থ্য কৰ্মীৰ দল গঠন কৰা হৈছে।এজনকৈ মেডিকেল অফিচাৰ সম্বলিত প্ৰতিটো গোটে জিলাখনৰ প্ৰতিটো অঞ্চলৰ প্ৰতিঘৰত কৰিব এই পৰীক্ষা।  কাৰোবাৰ শৰীৰত ক'ভিড - ১৯ কিবা লক্ষণ দেখা পালে,দ্বিতীয় পৰ্যায়ত চিকিৎসক আৰু লেৱৰটৰী টেকনিচিয়ানৰ দল উপস্থিত হৈ উক্ত ব্যক্তিজনৰ দেহৰ নমুনা সংগ্ৰহ কৰিব।জিলাখনত থকা ১৪৪ টা চাব চেন্টাৰৰ আশা কৰ্মী,এ পি ডব্লিউ আদিৰ জৰিয়তে গঠন কৰা হৈছে এই চিকিৎসা  কৰ্মীৰ দলবোৰ। ইতিমধ্যে জিলাখনত কৰ'না আক্ৰান্তৰ বাবে মুঠ ৬৭০খন বিচনা প্ৰস্তুত কৰি তোলা হৈছে। পৰবৰ্তী সময়ত অধিক সম্প্ৰসাৰণ কৰিব। পৰীক্ষণৰ সময়ত কোনো অশুভ পৰিৱেশৰ সৃষ্টি নকৰি সকলো সময়তে প্ৰশাসনৰ লগতে চিকিৎসা কৰ্মীসকলক সহযোগ কৰি কৰ'না প্ৰতিৰোধৰ বাবে একত্ৰিত হবলৈও অনুৰোধ কৰে।ইয়াৰোপৰি এই সময়ছোৱাত কোনো সামাজিক বিৰোধ সৃষ্টি নহ'বৰ বাবে গাঁও পঞ্চায়তৰ সদস্য বা ৱাৰ্ডৰ সদস্যসকলৰ সহায় লোৱা বুলিও ব্যক্ত কৰে উপায়ুক্তগৰাকীয়ে। ছেম্বাৰ্চ অৱ কমাৰ্চৰ লগত হোৱা আলোচনা মৰ্মে  লকডাউনৰ এই সময়ছোৱাত গোলাঘাট চহৰত দোকান সমূহ এ,বি,চি তিনিটা গোটত বিভক্ত কৰি খোলাৰ ব্যৱস্থা কৰিছে।এ গোটৰ দোকান সমূহ খোলা থাকিলে বি আৰু চি বন্ধ থাকিব। অৱশ্যে অত্যাৱশ্যকীয় সামগ্ৰী , ফাৰ্মাচী , কৃষি সামগ্ৰী তথা হাৰ্ডৱেৰ দোকানসমূহ এই গোটত অন্তৰ্ভুক্ত নহ'ব। মঙলবাৰে চহৰখনৰ সকলো দোকানত এই মাৰ্কিং কৰা হয় আৰু আজিৰে পৰা এই ব্যৱস্থা কাৰ্যকৰী  হৈছে।