খেল' ইণ্ডিয়াত পদক বিজয়ী কৰিণা পাটোৱাৰীক কংগ্ৰেছ বিধায়ক ৰূপজ্যোতি কুৰ্মীৰ স্কুটি উপহাৰ

হাজোৰ পৰা কমলাকান্ত দাস:

হাজো ৰাজহ চক্ৰৰ অন্তৰ্গত মনাহকুছি নিবাসী ভগৱান পাটোৱাৰীৰ কন্যা তথা দমদমা মহাবিদ্যালয়ৰ স্নাতক প্ৰথম ষান্নাসিকৰ ছাত্ৰী, খেল' ইণ্ডিয়াত ল'ন বলত এককভাৱে ব্ৰঞ্জ আৰু দলীয়ভাৱে সোণৰ পদক লাভ কৰি হাজোলৈ গৌৰৱ কঢ়িয়াই অনা কৰীণা পাটোৱাৰীক দেওবাৰে সন্ধিয়া হাজোৰ কংগ্ৰেছ নেতা দুলু আহমেদ আৰু মৰিয়নিৰ বিধায়ক ৰূপজ্যোতি কূৰ্মীয়ে বিপুলভাৱে সম্বৰ্দ্ধনা জনায়। কংগ্ৰেছ নেতা দুলু আহমেদ আৰু মৰিয়নী সমষ্টিৰ বিধায়ক ৰূপজ্যোতি কুৰ্মী,হাজো ব্লক কংগ্ৰেছৰ সভাপতি জিতেন্দ্ৰ ভৰালী,যুৱ কংগ্ৰেছৰ সভাপতি মুকুল আহমেদসহ দলীয় নেতা-কৰ্মী খেলুৱৈগৰাকীৰ বাসগৃহত উপস্থিত হয়।বিধায়ক ৰূপজ্যোতি কুর্মীয়ে কৰিণাক এখন স্কুটি উপহাৰ দিয়ে।দুলু আহমেদে খৰচৰ বাবদ প্ৰতি মাহে দহ হাজাৰকৈ এবছৰৰ খৰচৰ বাবদ এক লাখ বিশ হাজাৰ টকাৰ চেক কৰিণা পাটোৱাৰীৰ হাতত প্ৰদান কৰে।এই সন্দৰ্ভত বিধায়ক কুৰ্মীয়ে অতি দৰিদ্ৰ পৰিয়ালৰ খেলুৱৈ কৰিণা পাটোৱাৰীক এনে এটা উপহাৰ দিবলৈ সুবিধা দিয়াত কংগ্ৰেছ নেতা দুলু আহমেদক ধন্যবাদ জ্ঞাপন কৰে আৰু খেলুৱৈগৰাকী যাতে ৰাষ্ট্ৰীয়-আন্তঃৰাষ্ট্ৰীয় পৰ্যায়ত উজলি উঠিব পাৰে,তাৰ কামনা কৰে।হাজোৰ কংগ্ৰেছ নেতা দুলু আহমেদ,মুখপাত্ৰ দিলীপ কুমাৰ শৰ্মাই খেলুৱৈগৰাকীৰ উজ্জ্বল ভৱিষ্যৎ কামনা কৰে।এই অনুষ্ঠানতে অঞ্চলটোৰ বিভিন্ন অনুষ্ঠান-প্ৰতিষ্ঠান,ব্যক্তি বিশেষে খেলুৱৈগৰাকীক সম্বৰ্দ্ধনা জনায় ।