বৰভাগত সাংবাদিক পেঞ্চনাৰ নাউদত্ত তালুকদাৰক সম্বৰ্ধনা

নৰেন শৰ্মা,বাহাৰঘাট:

নলবাৰী জিলাৰ বৰভাগৰ প্ৰবীণ সাংবাদিক তথা জিলাখনৰ একমাত্ৰ সাংবাদিক  পেঞ্চনাৰ নাউদত্ত তালুকদাৰক   দেওবাৰে বৰভাগ প্ৰেছ ক্লাবৰ তৰফৰ পৰা ৰাজহুৱাভাৱে সম্বৰ্ধনা জনোৱা হয় ৷এই উপলক্ষে প্ৰেছ ক্লাবৰ সভাপতি ৰমেন তালুকদাৰৰ সভাপতিত্বত অনুষ্ঠিত সভাত  মুখ্য অতিথি হিচাপে উপস্থিত থাকি নলবাৰী জিলাৰ উপায়ুক্ত ভাৰতভূষণ দেৱচৌধুৰীয়ে কয় -'প্ৰযুক্তিগত ব্যৱস্থা নথকা সময়ত কি পৰিস্থিতিত নাউদত্ত তালুকদাৰে সাংবাদিকতা কৰিছিল সেয়া চিন্তাৰ বিষয়। সেই সময়ত তেওঁৰ সাংবাদিকতা কৰাৰ কি  হাবিয়াস আছিল,সেই বিষয় লৈ মই আচৰিত হৈছো' ৷ তেওঁ ব্যক্তিগতভাৱে নাউদত্ত তালুকদাৰক লগ কৰাৰ লগতে দীপাণ্বিতাত প্ৰদূষণমুক্ত পৰিৱেশ গঢ়াৰ বাবে আহ্বান জনায়। নিৰ্দিষ্ট বক্তা হিচাপে উপস্থিত থাকি বৰভাগ মহাবিদ্যালয়ৰ অৱসৰপ্ৰাপ্ত ভাৰপ্ৰাপ্ত অধ্যক্ষ ফণীধৰ ডেকাই মানুহক জীয়াই থকা কালতে এনে সন্মান দিয়াতো উচিত বুলি কৈ বৰভাগ প্ৰেছ ক্লাবৰ এনে মহানতাৰ শলাগ লয়। তেওঁ সাংবাদিকৰ বিৰুদ্ধে আক্ৰোষমূলকভাৱে হোৱা হত্যাৰ দৰে বিভিন্ন ঘটনাৰ উদ্ধৃতি দি বক্তব্য‌  প্ৰদান কৰে।নিৰাপত্তাৰ প্ৰতি ভাবুকি অহাৰ পিছতো সাংবাদিকসকলৰ কলম বন্ধ হোৱা নাই বুলি সাংবাদিকতাৰ ধৰ্মক  তেওঁ প্ৰশংসা কৰে। বৰভাগ প্ৰেছ ক্লাবৰ সভাপতি ৰমেন তালুকদাৰৰ সভাপতিত্বত অনুষ্ঠিত সভাখনত বক্তব্য প্ৰদান কৰে অসম গ্ৰামীন জীৱিকা অভিযান নলবাৰী জিলা প্ৰকল্প পৰিচালক চন্দন তালুকদাৰ, সদৌ অসম সাংবাদিক সন্থাৰ সাধাৰণ সম্পাদক নকুল তালুকদাৰ, নলবাৰী জিলা সাংবাদিক সন্থাৰ প্ৰধান সম্পাদক ৰমেন কলিতাই। উপায়ুক্তৰ পৰা সম্বৰ্ধনা গ্ৰহণ কৰি প্ৰবীন সাংবাদিক, সাংবাদিক পেঞ্চনাৰ নাউদত্ত তালুকদাৰে  নিজৰ অনুভৱ ব্যক্ত কৰে। এই সম্বৰ্ধনাত মানপত্ৰ, শৰাই, জাপি গামোচা, আৰু মোবাইল এটা প্ৰদান কৰা হয়। সভাৰ উদ্দেশ্যে ব্যাখ্যা কৰে ক্লাবৰ সম্পাদক হিমজ্যোতি ভূঞাই। সভাৰ আঁত ধৰে সহকাৰী সম্পাদক পংকজ কলিতাই। সভাত বৰভাগ সংগীত মহাবিদ্যালয়ৰ অধ্যক্ষ নগেন কাকতিৰ নেতৃত্বত আৰম্ভণি গীতৰ লগতে শিল্পী ধাৰেশ্বৰ দাস, সুনীল দাস তথা ডিম্পী বৰ্মনৰ গীতে উপস্থিত সকলোকে মুগ্ধ কৰে ৷ সভাৰ পূৰ্বে পুৱাৰ ভাগত সদৌ অসম সাংবাদিক সন্থাৰ পতাকা উত্তোলন কৰে সদৌ অসম সাংবাদিক সন্থাৰ সাংগঠনিক সম্পাদক কিশোৰ কুমাৰ কলিতাই। শ্বহীদ তৰ্পণ কৰে বৰভাগ প্ৰেছ ক্লাবৰ সাধাৰণ সম্পাদক হিমজ্যোতি ভূঞাই। শ্বহীদ বেদীত মাল্যৰ্পণ কৰে অসম জাতীয়তাবাদী যুৱ-ছাত্র পৰিষদৰ বৰভাগ আঞ্চলিক সমিতিৰ সভাপতি তাজিম‌উদ্দিন আহমেদে। পোহৰৰ উৎসৱ দীপাৱলী উপলক্ষে বন্তি প্ৰজ্বলন কৰে ক্ৰমে  গ্ৰাম্য বিকাশ মঞ্চৰ সভাপতি পৃত্থিভূষণ ডেকা, সদৌ নলবাৰী জিলা ছাত্ৰ সন্থাৰ সহকাৰী সম্পাদক  সমৰজ্যোতি মহন্ত, উপৰ বৰভাগ মৌজাৰ মৌজাদাৰ নলিনী তালুকদাৰ, অৱসৰপ্ৰাপ্ত প্ৰধান শিক্ষক জ্যোতিষ চন্দ্ৰ ভূঞা, বৰভাগ জ্যেষ্ঠ নাগৰিক মঞ্চৰ সভাপতি দ্বীজেন কাকতকাকতি সম্পাদক কমল তালুকদাৰে।