খোল-তাল, হৰধ্বনিৰে বৃহত্তৰ জয়সাগৰ শ্ৰীকৃষ্ণ ৰাসলীলা মণ্ডপৰ লাইখুটা স্থাপন

শিৱসাগৰৰ  পৰা কল্যাণজ্যোতি বুঢ়াগোহাঁই

বিগত বৰ্ষৰ দৰে এই বৰ্ষতও জয়সাগৰ সাংস্কৃতিক কেন্দ্ৰৰ উদ্যোগত আৰু জয়সাগৰৰ ৩০ খন গাঁৱৰ ৰাইজৰ সহযোগত অহা ১২ আৰু ১৩ নৱেম্বৰত ঐতিহাসিক জয়সাগৰৰ পৰাগধৰ চলিহা ষ্টেডিয়ামত বৰ্ণাট্য কাৰ্যসূচীৰে শ্ৰীকৃষ্ণৰ ৰাসলীলা অনুষ্ঠিত কৰিবলৈ লোৱা হৈছে। এই উদ্দেশ্যে শুকুৰবাৰে জয়সাগৰৰ পৰাগধৰ চলিহা ষ্টেডিয়ামত দুইশতাধিক ভকত বৈষ্ণৱৰ উপস্থিতিত খোল- তাল, উৰুলি আৰু হৰধ্বনিৰে মুখৰিত এক মাংগলিক পৰিৱেশৰ মাজত ৰাস মণ্ডপ আৰু অস্থায়ী নামঘৰৰ লাইখুটা স্থাপন কৰা হয়। 

ৰাস মণ্ডপৰ লাইখুটা স্থাপন কৰে ডিমৌ আদৰ্শ চিকিৎসালয়ৰ উপ অধীক্ষক ৰূপম জ্যোতি বৰকাকতিয়ে। লাইখুটা স্থাপন কৰি তেওঁ কয়,  শ্ৰীকৃষ্ণৰ ৰাসলীলা উদযাপনে সমাজত গঢ় লৈ উঠা অশুভ শক্তি সমুহক নাশ কৰি এক আধ্যাত্মিক আৰু সুস্থ সামাজিক বাতাবৰণ সৃষ্টি কৰাৰ লগতে নৱপ্ৰজন্মক উশৃংখলতাৰ বিপৰীতে আধ্যাত্মিক দিশে অগ্ৰসৰ হ'বলৈ মনোবল বৃদ্ধি কৰে বুলিও তেওঁ মন্তব্য কৰে। 

আনহাতে অস্থায়ী নামঘৰৰ লাইখুটা স্থাপন কৰে শিৱসাগৰ মহাবিদ্যালয়ৰ অধ্যক্ষ প্ৰফুল্ল চন্দ্ৰ কলিতাই। 

উদযাপন সমিতিৰ যুটীয়া সম্পাদক ৰুবুল ভূঞা আৰু জয়সাগৰ সাংস্কৃতিক কেন্দ্ৰৰ সম্পাদক আনন্দ কুমাৰ বৰাই আঁত ধৰা অনুষ্ঠানটোত বন্তি প্ৰজ্বলন কৰে সমাজকৰ্মী আতুল দত্তই। উদযাপন সমিতিৰ সভাপতি প্ৰদীপ কুমাৰ বৰাই উপস্থিত সকলো ৰাইজক ধন্যবাদ জনোৱাৰ লগতে সকলোৰে সহায় সহযোগীতা দিহা পৰামৰ্শ বিচাৰে।