অসম সাহিত্য সভাৰ দ্বাৰা প্ৰবীন অভিনেত্ৰী বীণা দাস বৰাক সম্বৰ্ধনা জ্ঞাপন

বৰপেটাৰোডৰ পৰা ৰঞ্জিত তালুকদাৰৰ প্রতিবেদন :

অসম সাহিত্য সভাৰ ভ্ৰাম্যমাণ পৰিমণ্ডলৰ সৈতে মৈত্ৰী বন্ধন সমিতিয়ে ভ্ৰাম্যমাণ থিয়েটাৰৰ নাট্যকাৰ,অভিনেতা,কলা কুশলী সকলক সম্বৰ্ধনা কাৰ্যসূচীৰ অধীনত এসময়ত বলিষ্ঠ অভিনয়ৰে বহু নাটকত অভিনয় কৰা বীণা বৰা দাসক যোৱা ২ অক্টোবৰত তেওঁৰ বৰপেটাৰ 
মেটুৱাকুছিস্থিত বাসভৱনত সম্বৰ্ধনা জ্ঞাপন কৰে ।অসম সাহিত্য সভাৰ গুৱাহাটী কাৰ্য্যালয়ৰ সম্পাদক ড০ সঞ্জীৱ কুমাৰ শৰ্মাই অভিনেত্ৰী গৰাকীক শুভেচ্ছা জনাই অসম  সাহিত্য সভাই  অসমৰ ভাষা,সাহিত্য,কলা সংস্কৃতি লৈ অৰিহণা যোগোৱা প্ৰতিজন ব্যক্তি জাতীয় জীৱনৰ অংশীদাৰ আৰু তেওঁলোকৰ অৱদানৰ নূন্যতম স্বীকৃতিৰ  প্ৰয়াস এই সম্বৰ্ধনা বুলি ভাষণ প্ৰসংগত কয়। সম্বৰ্ধনা গ্ৰহণ কৰি বীণা বৰা দাসে আনন্দত অভিভূত হয় আৰু তেওঁক এনেদৰে স্বীকৃতি দিয়াৰ বাবে কৃতজ্ঞতা প্ৰকাশ কৰে। নটসূৰ্য ফণী শৰ্মাৰ সৈতে নাট ছিৰাজকে আদি কৰি বহু নাটকত কৰা অভিনয়ৰ কথা মনত পেলাই আৱেগিক হৈ পৰে  বিশিষ্ট অভিনেত্ৰী গৰাকী। সম্বৰ্ধনা অনুষ্ঠানত অসম সাহিত্য সভাৰ প্ৰকাশন আহ্বায়ক মনিক আহমেদ, কেন্দ্ৰীয় কাৰ্যনিৰ্বাহক গোবিন্দ তালুকদাৰ , বৰপেটা শাখা সাহিত্য সভাৰ সভাপতি উদ্ধৱ দাস, ভাৰত চন্দ্ৰ দাস, হৰেকৃষ্ণ দাস আদি কেবাগৰাকী কৰ্মকৰ্তা উক্ত অনুষ্ঠানত উপস্থিত থাকে।