ডিব্ৰুগড় জিলাৰ জয়পুৰত দুধৰ্ষ আলফা কেডাৰৰ আত্মসমৰ্পন

নামৰূপৰ পৰা সমীৰণ বৰুৱাৰ প্ৰতিবেদন :

জয়পুৰ আৰক্ষী আৰু সেনাবাহিনীৰ সন্মুখত বুধবাৰে এগৰাকী আলফা(স্বা)ৰ সদস্যই আত্মসমৰ্পণ কৰে।আত্মসমৰ্পনকাৰী আলফা (স্বাধীন)ৰ সদস্যজনক স্বয়ম্ভু কৰ্পৰেল ডাৱালজ্যোতি দত্ত ওৰফে দায়ৰ অসম বুলি জানিব পৰা গৈছে। সেনাবাহিনীৰ পৰা তথ্য অনুসৰি আত্মসমৰ্পনকাৰী আলফা কেডাৰ গৰাকীৰ ঘৰ যোৰহাট জিলাৰ নবৰা অঞ্চলত। আত্মসমৰ্পনৰ সময়ত কেডাৰজনে ৪ ৰাউণ্ড সক্ৰিয় গুলীসহ চীনত নিৰ্মিত এটা পিষ্টল জমা দিয়ে। উল্লেখ্য যে প্ৰাথমিক সোধ পোছত তেওঁ ২০১৭ চনত আলফাত যোগদান কৰা আৰু আলফাৰ বিগ্ৰেদিয়াৰ দৃষ্টি ৰাজখোৱাৰ ব্যক্তিগত নিৰাপত্তাৰক্ষী হিচাপে কৰ্মৰত আছিল বুলি সেনাবাহিনীৰ আগত স্বীকাৰ কৰে। ২০১৮ চনৰ নবেম্বৰ মাহত তেওঁক যোৰহাট আৰক্ষীয়ে গ্ৰেপ্তাৰ কৰিছিল যদিও ২০১৯ত জামিন লাভ কৰি তেও পুনৰ আলফাত যোগদান কৰিছিল। বৰ্তমান সেনাবাহিনীয়ে আত্মসমৰ্পনকাৰী আলফা সদস্যজনক জয়পুৰ আৰক্ষীৰ হাতত গতাই দিছে।