নীলবাগানত প্ৰেমিকৰ ছুৰীকাঘাতত আহত প্ৰেমিকা

ডবকাৰ পৰা জমিৰ উদ্দিন তালুকদাৰ

পৰিয়ালৰ অসন্মতিত পলাই গৈ বিয়াত বহাৰ প্ৰস্তাৱ প্ৰত্যাখ্যান কৰাত হোজাই জিলাৰ নীলবাগানত এজন যুৱকে এগৰাকী ছাত্ৰীক চুৰিৰে হানি আহত কৰাৰ এক চাঞ্চল্যকৰ ঘটনা পোহৰলৈ আহিছে ৷ বাতৰি অনুসৰি নীলবাগানৰ যুৱ ব্যৱসায়ী নাজিৰ আহমেদ নামৰ যুৱক এজনে এই কাণ্ড সংঘটিত কৰে ৷

নীলবাগান মডেল উচ্চতৰ মাধ্যমিক বিদ্যালয়ত দ্বাদশ শ্ৰেণীত পঢ়ি থকা এগৰাকী ছাত্ৰীৰ সৈতে প্ৰেমৰ সম্পৰ্ক আছিল নাজিৰ    আহমেদৰ ৷ যোৱা ৪ ফেব্ৰুৱাৰীৰ দিনা ছাত্ৰীগৰাকী বিদ্যালয়লৈ যোৱাৰ পথত প্ৰেমিক নাজিৰ আহমেদে ছাত্ৰীগৰাকীক নিজৰ ব্যৱসায়ীক প্ৰতিষ্ঠানলৈ মাতি আনি আদালতত গৈ বিয়াত বহাৰ প্ৰস্তাৱ দিয়ে৷ নিজৰ পৰিয়ালৰ অসন্মতিত এনেকৈ বিয়াত বহাৰ প্ৰস্তাৱ নাকচ কৰাত প্ৰেমিক নাজিৰ আহমেদে ছাত্ৰীগৰাকীক উপৰ্যুপৰি আক্ৰমণ কৰে ৷

খবৰ অনুসৰি ছাত্ৰীগৰাকীৰ পেটত চুৰিৰে আক্ৰমণ কৰাত সম্প্ৰতি সংকটজনক অৱস্থাত নগাঁও অসামৰিক চিকিৎসালয়ত চিকিৎসাধীন হৈ আছে৷ ইপিনে, এই ঘটনা সংক্ৰান্তত পলমকৈ আজি ছাত্ৰীগৰাকীৰ আইতাকে মোৰাঝাৰ আৰক্ষী থানাত ৩৪/১৯ নম্বৰত ভাৰতীয় দণ্ডবিধি আইনৰ ৩৬৬/৩৪২/৩২৬ ধাৰাত এটি গোচৰ পঞ্জীয়ন কৰি তদন্ত আৰম্ভ কৰিছে ৷ সম্প্ৰতি প্ৰেমিক নাজিৰ আহমেদ পলাতক হোৱাত ঘটনা সম্পৰ্কত তেওঁৰ প্ৰতিক্ৰিয়া জানিব পৰা নাই৷