শিৱসাগৰত বিধেয়কৰ বিৰুদ্ধে মটক যুৱ ছাত্ৰৰ অৰ্থনৈতিক অৱৰোধ

শিৱসাগৰৰ বিশেষ প্ৰতিবেদন

শিৱসাগৰত নাগৰিকত্ব সংশোধনী বিধেয়ক বাতিলৰ দাবীত মটক যুৱ-ছাত্ৰ সন্মিলনৰ অৰ্থনৈতিক অৱৰোধ। কেন্দ্ৰীয় আৰু ৰাজ্য চৰকাৰে অসমৰ সকলো দল-সংগঠন তথা সাধাৰণ ৰাইজে বিৰোধিতা কৰি অহা স্বত্তেও নাগৰিকত্ব সংশোধনী বিধেয়ক-২০১৬ গৃহীত কৰি অবৈধ হিন্দু বাংলাদেশী সংস্থাপন কৰিব বিচৰা কাৰ্যৰ বিৰুদ্ধে সৰৱ হৈছে মটক যুৱ ছাত্ৰ সন্মিলন।

সংগঠনটোৱে দেওবাৰে পুৱাৰে পৰা শিৱসাগৰত ৰাষ্ট্ৰীয় ঘাইপথ অৱৰোধৰ লগতে অৰ্থনৈতিক অৱৰোধৰ কাৰ্যসূচী ৰূপায়ণ কৰে। মটক জনগোষ্ঠী অধ্যুষিত অঞ্চলৰ মাজেদি যোৱা ৰাষ্ট্ৰীয় ঘাই পথত কয়লা, চাহ, তৈলজাত সামগ্ৰীৰ সৰবৰাহ বন্ধ কৰাৰ লগতে তৈল উৎপাদন বন্ধ কৰি জাতিধ্বংসী বিধেয়ক বাতিলৰ দাবী জনাই তীব্ৰ প্ৰতিবাদ সাব্যস্ত কৰে। 

সংগঠনটোৱে শিৱসাগৰৰ টেক্সি মঠাদাংত অৰ্থনৈতিক অৱৰোধ কৰি নামনিৰ পৰা উজনিলৈ অহা আৰু উজনিৰ পৰা নামনিলৈ যোৱা সকলো কয়লা, চাহ আৰু তেল সৰবৰাহ কৰা গাড়ী আৱদ্ধ কৰি ৰাখে।

ইয়াৰোপৰি তৈলক্ষেত্ৰলৈ যোৱা অ'এনজিচিৰ বাহনসমূহ চলাচলতো বাধা প্ৰদান কৰে সংগঠনটোৱে। যাৰ বাবে অৱৰোধ স্থলীত শ শ ট্ৰাক আৱদ্ধ হৈ পৰাত হাহাকাৰ পৰিস্থিতিৰ সৃষ্টি হয়। তাৰোপৰি পথৰ মাজত টায়াৰ জ্বলাই সংগঠনটোৰ সদস্যই বিজেপি মুৰ্দাবাদ, সৰ্বানন্দ সোণোৱাল মুৰ্দাবাদ, হিমন্ত বিশ্ব শৰ্মা মুৰ্দাবাদ আদি শ্লোগানেৰে পৰিবেশ উত্তাল কৰি তোলে। 

সংগঠনটোৰ নেতাই স্পষ্ট কৰি দিয়ে যে এই অৰ্থনৈতিক অৱৰোধ কাৰ্যসূচী ১১ ফেব্ৰুৱাৰীলৈকে অব্যাহত থাকিব। যদি বিজেপি নেতৃত্বধীন কেন্দ্ৰীয়-ৰাজ্য চৰকাৰে অতি শীঘ্ৰে নাগৰিকত্ব সংশোধনী বিধেয়ক-২০১৬ বাতিল নকৰে আৰু ছয় জনগোষ্ঠীক জনজাতিৰ মৰ্যাদা প্ৰদান নকৰে তেন্তে অৰ্থনৈতিক অৱৰোধতকৈয়ো চৰকাৰে ভয়ংকৰ আন্দোলনৰ সন্মুখীন হ'ব লাগিব বুলি সকিয়াই দিয়ে।