বঙাইগাঁৱত গণৰাজ্য দিৱসৰ কাৰ্যসূচীত উপস্থিত থাকিব মন্ত্ৰী ভৱেশ কলিতা

সমগ্ৰ দেশৰ লগতে বঙাইগাঁও জিলাতো জিলা প্ৰশাসনৰ উদ্যোগত বঙাইগাঁও চহৰৰ স্থানীয় গান্ধী ময়দানত কাইলৈ উলহ-মালহেৰে ভাৰতবৰ্ষৰ ৭০সংখ্যক গণৰাজ্য দিৱস বিস্তৃত কাৰ্যসূচীৰে উদ্‌যাপন কৰা হ'ব৷ ইতিমধ্যে গণতন্ত্ৰ দিৱস উদ্‌যাপনৰ বাবে জিলা প্ৰশাসনে সকলো প্ৰস্তুতি সম্পূৰ্ণ কৰি তুলিছে৷ কাৰ্যসূচী অনুসৰি পুৱা ৫ বজাত জিলা তথ্য আৰু জনসংযোগ বিভাগৰ দ্বাৰা প্ৰভাত ফেৰীৰ পিচতে মাইকযোগে দেশভক্তিমূলক গীত বজোৱা হ'ব৷

ইয়াৰ পিচতে ব্যক্তিগত বাসভৱনত জাতীয় পতাকা উত্তোলন, চৰকাৰী, অৰ্ধ-চৰকাৰী আৰু বেচৰকাৰী অনুষ্ঠান-প্ৰতিষ্ঠানসমূহত জাতীয় পতাকা উত্তোলন, শিক্ষানুষ্ঠানৰ পৰা গান্ধী ময়দানলৈ ছাত্ৰ-ছাত্ৰীৰ শোভাযাত্ৰা, ছহিদ তৰ্পণ, গান্ধী ময়দানত বিশিষ্ট অতিথিৰ দ্বাৰা আনুষ্ঠানিকভাৱে জাতীয় পতাকা উত্তোলন, সম্বৰ্ধনা, পুৰস্কাৰ প্ৰদান, অনুদান বিতৰণ, সাংস্কৃতিক কাৰ্যক্ৰমণিকা, বঁটা বিতৰণ, কণ কণ ল'ৰা-ছোৱালীৰ মাজত খেল-ধেমালি প্ৰতিযোগিতা, বঙাইগাঁও সমূহীয়া স্বাস্থ্য কেন্দ্ৰ, মানসিক পুনৰ সংস্থাপন কেন্দ্ৰ আৰু শিশু গৃহত ফলমূল বিতৰণ, মায়াপুৰী আৰু জ'লী মেক্স কথাছবি গৃহত ল'ৰা-ছোৱালীৰ বাবে বিনামূলীয়া কথাছবি প্ৰদৰ্শন, আবেলি প্ৰীতি ক্ৰিকেট খেল আৰু সন্ধিয়া বন্তি প্ৰজ্বলন আদি কাৰ্যসূচী জিলা প্ৰশাসনে গ্ৰহণ কৰিছে৷

ইপিনে জিলা তথ্য আৰু জনসংযোগ বিভাগৰ তৰফৰ পৰা শেহতীয়াকৈ জানিবলৈ দিয়া মতে, কাইলৈ ৰাজ্যৰ জলসিঞ্চন মন্ত্ৰী ভৱেশ কলিতাই বঙাইগাঁৱৰ গণৰাজ্য দিৱসৰ অনুষ্ঠানত উপস্থিত থাকি ৰাষ্ট্ৰীয় পতাকা উত্তোলন কৰিব৷